Türkiye dhe Greqia kanë ndërmarrë hapa të ndërsjellë për të ulur tensionet mes tyre në Detin Egje.
Derisa Greqia do të zhvillojë stërvitje në shkallë të vogël në vend të stërvitjes vjetore Kataigis, Forcat e Armatosura Turke do të kryejnë stërvitje taktike në vend të stërvitjes së saj të rregullt Ujku Detar.
Ndjenja e përbashkët pas tërmeteve shkatërruese në Türkiye në shkurt të këtij viti dhe aksidenti tragjik hekurudhor në Greqi disa javë më vonë ndikuan në përmirësimin e marrëdhënieve midis dy vendeve.
Greqia kreu aktivitete në shkallë të vogël që synojnë ruajtjen e standardeve të trajnimit në vend të stërvitjes Kataigis, e cila zakonisht kryhet në maj/qershor për të mbuluar të gjithë detin Egje, sipas Ministrisë së Mbrojtjes Kombëtare të Türkiyes.
Si kundërpërgjigje, Ministria Turke e Mbrojtjes mori masa për aktivitetet e planifikuara të Komandës së Forcave Detare, duke mbajtur stërvitje taktike në përputhje me parimet e marrëdhënieve ndërkombëtare dhe reciprocitetit në vend të stërvitjes Ujku i Detit.
Stërvitja, e cila zakonisht zhvillohet çdo vit në javën e parë të qershorit, përfshin mijëra personel me mbi 200 elementë, duke përfshirë anije, nëndetëse dhe mjete ajrore me pilot dhe pa pilot.
Më herët, ministri turk i Mbrojtjes Hulusi Akar tha se Türkiye nuk mban një qëndrim agresiv ndaj asnjë prej fqinjëve të saj.
“Ne jemi për zgjidhjen e problemeve përmes dialogut dhe mjeteve paqësore në kuadër të së drejtës ndërkombëtare dhe marrëdhënieve të fqinjësisë së mirë”, tha ai.
Duke treguar se si Türkiye dëshiron ta bëjë Egjeun "një det miqësie", ai tha se pasuria e të dyja palëve duhet të ndahet në mënyrë të drejtë dhe të gjithë duhet të jetojnë në një mjedis të sigurt dhe të begatë.
Në fillim të prillit, ministri grek i Mbrojtjes Nikolaos Panagiotopoulos vizitoi gjithashtu provincën Hatay të goditur nga tërmeti me ftesë të Akar.
Pas takimit të tyre në zonën e tërmetit, shefat e mbrojtjes ranë dakord të zhvillojnë një agjendë të bazuar në marrëdhëniet e fqinjësisë së mirë./AA
