Vrasja e Armend Xhikës në Britani, I dyshuari: Armën e kisha për të frikësuar

I dyshuari kryesor për vrasjen e Armend Xhikës më 13 maj 2021 në Britani, ka mohuar akuzat.

Mentor Selmani, 28 vjeç, pranoi se ishte armatosur me një teh gjatë një përleshjeje të dhunshme në Burngreave, Sheffield, ku mbeti i vrarë Armend Xhika, 22 vjeç.

Por ai këmbënguli se e kishte përdorur armën vetëm për të “frikësuar” burrat që po debatonin me shokun e tij Eljaso Cela më 13 maj 2021 dhe nuk goditi askënd.

Selmani, Marsid Senia dhe Mardov Dushku janë në gjyq për vrasjen e Xhikës në Sheffield Croën Court.

Selmani, Senia, 25 vjeç dhe Dushku, 30 vjeç akuzohen gjithashtu për plagosjen e rëndë të tre miqve të Armend Xhikës gjatë një konfrontimi mes dy grupeve të shqiptarëve në Earl Marshal Road.

Prokurorët thonë se Cela dhe vëllai i tij Mateo gjithashtu morën pjesë në dhunën vdekjeprurëse, por ata nuk janë në gjyq pasi mbeten në arrati dhe nuk u kapën nga policia.

Cela dhe Xhika kishin komunikuar të takoheshin në Burngreave për të zgjidhur një mosmarrëveshje në lidhje me një aksident që ata ishin përfshirë në Rotherham më parë më 13 maj, është thënë përpara jurisë.