Policia e Shtetit ka reaguar mbrëmjen e sotme në lidhje me një postim në rrjetet sociale, ku duken disa biseda mes disa punonjësve të Policisë së Komisariatit nr.1 në Tiranë.

 

Në lidhje me rastin në fjalë, Policia e Shtetit bën me dije se ka marrë masën e pezullimit nga detyra për një periudhë 30-ditore për Shefin për Krimet në Komisariatin e Policisë Nr. 1, në DVP Tiranë, i cili akuzohet për shkelje të rëndë disiplinore.

 

 

“Në lidhje me një postim në rrjetet sociale, në të cilin pasqyrohet komunikimi joetik në një grup komunikimi në platformën WhatsApp, midis disa punonjësve të Policisë të Komisariatit të Policisë Nr. 1, Tiranë, ju bëjmë me dije se:

 

Menjëherë pas marrjes dijeni, Drejtoria e Standardeve Profesionale në Drejtorinë e  Përgjithshme të Policisë së Shtetit ka pezulluar nga detyra, për një periudhë 30-ditore, Shefin për Krimet në Komisariatin e Policisë Nr. 1, në DVP Tiranë, Komisar R. D., për shkelje të rëndë disiplinore, të parashikuar nga neni 204 i rregullores së Policisë së Shtetit.

 

Gjithashtu, Drejtoria e Standardeve Profesionale në Policinë e Shtetit, nën drejtimin e AMP-së, vijon punën për kryerjen e një hetimi të plotë administrativ për këtë rast. Policia e Shtetit është e vendosur për të ndëshkuar cilindo punonjës policie që cenon imazhin e Policisë dhe besimin e qytetarëve te Policia e Shtetit.”

 

Policia e Shtetit