Presidenti i Këshillit Evropian Charles Michel tha sot se Izraeli nuk mund të arrijë siguri pa paqe të qëndrueshme.
“Unë ia them këtë qeverisë së Izraelit se të përpiqesh të arrish siguri pa paqe është e pamundur”, tha Michel në fjalimin e tij në sesionin e 79-të të Asamblesë së Përgjithshme të OKB-së në New York.
“Pa paqe, nuk mund të ketë siguri të qëndrueshme. Një botë që drejtohet nga hakmarrja është një botë më pak e sigurt. Populli palestinez ka të drejtën e shtetit të tij”, shtoi ai.
“Kjo do të vazhdojë të rezultojë në dëmtimin e sigurisë izraelite dhe të të gjithë hebrenjve, nëse nuk krijohet një shtet i tillë”, shtoi ai.
“Kjo do të rezultojë në polarizim dhe minimin e sistemit ndërkombëtar, i cili nuk mund të mbështetet nga standarde të dyfishta”, theksoi shefi i Këshillit.
Në lidhje me konfliktin në Gaza, ku Izraeli ka vrarë më shumë se 41.000 palestinezë që nga tetori i kaluar, Michel tha: “Ne duam armëpushim të menjëhershëm, në përputhje me opinionin këshillues të Gjykatës Ndërkombëtare të Drejtësisë”.
“Jeta e çdo civili ka rëndësi”, tha ai, duke theksuar: “Ne dënojmë të gjitha sulmet pa dallim që synojnë popullsinë civile”.
“BE-ja po ndërmerr veprime dhe dëshiron të bëjë më shumë për të arritur paqen e qëndrueshme në kuadrin e një zgjidhjeje me dy shtete. Përshkallëzimi i pafund duhet të përfundojë”, theksoi ai.
“Ne duam një shtet demokratik dhe të fortë të Izraelit që jeton në paqe dhe siguri krah për krah me popullin palestinez”, tha Michel. “Populli palestinez, i cili duhet të ketë shtetin e tij të qëndrueshëm, meriton respekt dhe dinjitet”, shtoi zyrtari i lartë evropian.
Ai gjithashtu i përshkroi sulmet izraelite në Liban si “të papërgjegjshme”./aa
