Ministri i Jashtëm ukrainas, Dmytro Kuleba, gjatë takimit me të dërguarin e posaçëm të Kinës për çështjet e Euroazisë, Li Hui, tha se Ukraina nuk do të pranojë asnjë propozim për ndërprerjen e luftës.
Më 16 dhe 17 maj, i dërguari i posaçëm kinez, Li Hui, qëndroi në kryeqytetin e Ukrainës, Kiev, ku u takua me ministrin Dmytro Kuleba, njoftoi Ministria e Punëve të Jashtme e Ukrainës.
Gjatë takimit u diskutua për bashkëpunimin ndërmjet Ukrainës dhe Kinës si në nivel dypalësh ashtu edhe në kuadër të organizatave ndërkombëtare.
"Në takim u diskutuan edhe mënyrat për të ndaluar agresionin rus", thuhet në deklaratë.
Ministri Kuleba e informoi të dërguarin kinez në detaje për parimet e rivendosjes së një paqeje të qëndrueshme dhe të drejtë bazuar në respektimin e sovranitetit dhe integritetit territorial të Ukrainës.
"Kuleba theksoi se Ukraina nuk do të pranojë asnjë propozim që parashikon humbjen e territorit të saj ose ndërprerjen e luftës", thuhet në deklaratë.
Ai tërhoqi vëmendjen për rëndësinë e pjesëmarrjes së Kinës në zbatimin e formulës së paqes të Ukrainës, Iniciativës së Grurit të Detit të Zi, garantimit të sigurisë bërthamore dhe përpjekjeve të tjera të rëndësishme ndërkombëtare.
Palët diskutuan perspektivat afatgjata për zhvillimin e marrëdhënieve dypalëshe midis Ukrainës dhe Kinës dhe u tha se Kuleba dhe Li ranë dakord të përshpejtojnë dialogun për çështjet e rëndësishme./AA
