Komiku egjiptiano-amerikan Bassem Youssef tha se nuk do të votojë për një mandat tjetër për presidentin Joe Biden, pasi ai nuk mund të mbështesë dikë që nuk po dëgjon kërkesat për armëpushim në Gaza.
"Unë nuk dua të votoj për Bidenin", tha Youssef për Anadolu në një intervistë në Washington.
"Unë nuk mund të marr pjesë dhe t’i jap zërin tim Bidenit", shtoi ai.
"Dhe sigurisht që nuk mund të votoj për (ish-presidentin Donald) Trump. Është kundër të gjitha pikëpamjeve të mia, por nuk mund ta shpërblej me votë dikë që nuk e dëgjon kërkesën më të thjeshtë për armëpushim", shtoi ai.
Youssef, një kirurg zemre i kthyer në komik, tërhoqi miliona shikues në mbarë botën në një intervistë me Piers Morgan të Britanisë, në të cilën ai kritikoi luftën e Izraelit ndaj Gazës dhe narrativën perëndimore ndaj arabëve dhe palestinezëve.
"U vendosa në këtë situatë dhe dukej se po rezononte me njerëzit, por nuk mund ta shpjegoj pse apo si, por jam i kënaqur që thashë atë që kisha për të thënë", tha ai.
I pyetur për sfidat e shprehjes së pikëpamjeve të tij në SHBA, Youssef tha se ka sfida kudo në botë.
"Dua të them, ka shumë të meta në sistemin demokratik amerikan, në media, por të paktën ne kemi hapësirë për të folur. Dhe unë jam mirënjohës për këtë dhe e përdor atë hapësirë", shtoi ai.
"Ne përpiqemi sa më shumë që të jetë e mundur ta zgjerojmë atë lloj lirie të shprehjes", tha ai, duke shtuar se komedia është një burim i lirisë së shprehjes dhe një mënyrë për të shprehur veten.
"Ju mund të jetoni në një vend në të cilin ju ka pëlqyer të jetonit, por nuk jeni dakord me politikën e tij, dhe kjo është ajo që unë shpreh", tha ai, duke shtuar se shumë amerikanë mund të mos jenë 100 për qind në përputhje me të gjitha politikën e vendit.
Youssef, i cili jeton në California, ishte në Washington për turneun e tij të komedisë "Middle Beast".
"Shfaqja e komedisë stand-up në thelb ndjek historinë time nga të qenit mjek, në një prezantues televiziv e deri në daljen në Amerikë si emigrant. Dhe është një histori shumë personale me të cilën mund të lidhet kushdo, qoftë arab, mysliman, i krishterë dhe qoftë imigrantët që po i shohim aktualisht në Amerikë", shtoi ai./aa
