Një prezantues televiziv dhe gazetar palestinez u vra të martën në një sulm ajror izraelit në Rripin e Gazës, duke rritur numrin e vdekjeve të anëtarëve të shtypit të shënjestruar nga Izraeli që nga 7 tetori në 133, thanë zyrtarët dhe media shtetërore.
Muhammad Salama, i cili punonte për kanalin palestinez Al-Aqsa, u vra së bashku me gjithë familjen e tij kur avionët luftarakë izraelitë shënjestruan shtëpinë e tij në qytetin Deir al-Balah në pjesën qendrore të Rripit të Gazës, tha në një deklaratë Zyra e Medias në Gaza.
Zyra akuzoi ushtrinë izraelite për vrasjen e gazetarëve palestinezë për të "fshirë të vërtetën".
Izraeli nisi një ofensivë vdekjeprurëse në Rripin e Gazës pas një inkursioni ndërkufitar nga grupi palestinez Hamas më 7 tetor 2023. Bombardimet izraelite që pasuan kanë vrarë të paktën 30.717 njerëz dhe kanë plagosur 72.156 të tjerë, krahas shkatërrimit masiv dhe mungesës së nevojave.
Rreth 85 për qind e banorëve të Gazës janë zhvendosur nga sulmet izraelite ndërsa të gjithë përballen me pasiguri ushqimore, sipas OKB-së. Qindra mijëra njerëz jetojnë pa strehë dhe më pak se gjysma e kamionëve me ndihma po hyjnë në territor në krahasim me periudhën përpara fillimit të konfliktit.
Izraeli akuzohet për gjenocid në Gjykatën Ndërkombëtare të Drejtësisë (GJND), e cila në një vendim të përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza./aa
