Lufta në Ukrainë ka sjellë pasoja shkatërruese për shëndetin mendor dhe fizik për fëmijët ukrainas. Kështu deklaron UNICEF në një deklaratë. Mësohet se rreth 1.5 milionë fëmijë janë të rrezikuar nga depresioni, ankthi, çrregullimi i stresit post-traumatik dhe çështje të tjera të shëndetit mendor, me efekte dhe pasoja të mundshme afatgjata.
Gjithashtu, aksesi i fëmijëve dhe familjeve të tyre në shërbimet bazë shëndetësore është ndërprerë plotësisht, ndërkohë që mijëra fëmijë që ikin nga konflikti në të gjithë vendin u mungojnë vaksinat jetike për t’i mbrojtur nga poliomieliti, fruthi, difteria dhe sëmundje të tjera kërcënuese për jetën.
Në të njëjtën kohë, kriza ekonomike dhe energjetike e shkaktuar nga lufta ka sjellë humbje të konsiderueshme të të ardhurave për një numër të madh familjesh, me pasoja shkatërruese për mirëqenien e fëmijëve dhe familjeve të tyre. Në një sondazh të fundit të UNICEF-it 80% e të anketuarve kanë vërejtur një përkeqësim të situatës së tyre ekonomike, ndërsa sipas analizës së UNICEF-it, përqindja e fëmijëve që jetojnë në varfëri është pothuajse dyfishuar nga 43% në 82%.
