Presidenti i Türkiyes, Recep Tayyip Erdoğan dhe kryeministri i Kazakistanit, Oljas Bektenov, kanë diskutuar çështjet rajonale dhe globale, sulmet disamujore të Izraelit në Rripin e Gazës, si dhe zhvillimet në rajon.
Bektenov u prit nga presidenti Erdoğan në kompleksin presidencial në kryeqytetin turk Ankara.
“Takimi trajtoi marrëdhëniet dypalëshe midis Türkiyes dhe Kazakistanit, çështjet rajonale dhe globale, sulme e Izraelit në Gaza, si dhe situatën e fundit në rajon”, njoftoi Drejtoria Turke e Komunikimeve.
Duke theksuar se qeveria izraelite po përpiqet të përshkallëzojë konfliktet në të gjithë rajonin, Erdoğan theksoi nevojën urgjente për një armëpushim të menjëhershëm dhe të qëndrueshëm, si dhe për një bashkëpunim të zgjeruar në kuadër të Organizatës së Shteteve Turke (OTS) për të lehtësuar ndihmën humanitare për Gazën.
“Presidenti Erdoğan deklaroi gjithashtu se është e rëndësishme të zhvillohen marrëdhëniet me Kazakistanin në luftën kundër terrorizmit, ekonomisë dhe fushave të tjera, veçanërisht industrisë së mbrojtjes”, tha drejtoria turke.
Izraeli ka vrarë më shumë se 34 mijë palestinezë që nga sulmi ndërkufitar i Hamasit më 7 tetor të vitit të kaluar, kur sipas Tel Avivit u vranë afër 1.200 njerëz.
Më shumë se gjashtë muaj pas luftës izraelite, sipërfaqe të gjera të Gazës janë në gërmadha dhe 85 për qind e popullsisë është detyruar të zhvendoset brenda enklavës mes një bllokade të gjërave thelbësore si ushqimi dhe ilaçet.
Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në muajin janar urdhëroi Tel Avivin të ndalojë aktet e gjenocidit dhe të marrë masa për të garantuar ofrimin e ndihmës humanitare për civilët në Gaza./aa
