Banka e Shqipërisë sot, në Ditën Ndërkombëtare të Muzeve, organizoi disa aktivitete për të rritur ndërgjegjësimin për rolin jetësor të muzeve në shoqëri.
Sipas BSH-së, Muzeu i Bankës së Shqipërisë hapi dyert për rreth 750 vizitorë, duke ofruar një sërë aktivitetesh edukative dhe argëtuese në përputhje me temën e këtij viti “Muzetë për edukim dhe kërkim”.
Aktivitetet përfshinë edhe ekspozitën “Vlera e parasë në periudhën 1912-aktualisht”, që trajtoi ndryshimet në sistemin monetar dhe financiar të Shqipërisë përgjatë një shekulli.
U shfaqën filma të realizuar nga studentët e Universitetit Barleti dhe Institutit Harry Fultz, që trajtuan qarkullimin monetar në Perandorinë Bizantine dhe Republikën e Venecias; dhe përdorimin e parasë gjatë viteve të regjimit komunist.
U ekspozuan punime artistike nga nxënësit e shkollave “Kol Jakova” dhe “Konferenca e Pezës”, duke u fokusuar në tregjet dhe kartëmonedhat kombëtare të viteve 1965-1985.
Aktivitetet patën edhe këndin e monedhave suvenir, ku nxënës të shkollave 9-vjeçare realizuan monedhën e tyre me plastelinë dhe letër alumini.
Gjithashtu, u zhvillua edhe një leksion i hapur nga Akad. Asoc. Adrian Civici mbi historinë e krijimit të bankave mesjetare evropiane, sfidat dhe krizat e tyre të para.
Këto aktivitete bënë bashkë shumë vizitorë, që mësuan më shumë rreth trashëgimisë sonë kulturore dhe ekonomike./ata
