Trupat e të paktën 14 palestinezëve u nxorën nga rrënojat në Rafah, në jug të Rripit të Gazës, thanë sot burimet mjekësore për Anadolu.
Burimet thanë se morën 14 trupa palestinezë nga zonat në perëndim të qytetit të Rafah në Rripin e Gazës.
"Të paktën 10 prej atyre trupave ishin të dekompozuar dhe të paidentifikueshëm", shtuan burimet mjekësore.
Duke shpërfillur një rezolutë të Këshillit të Sigurimit të OKB-së që kërkon armëpushim të menjëhershëm, Izraeli është përballur me reagime ndërkombëtare në mes të ofensivës së tij brutale në Gaza që nga një sulm i 7 tetorit 2023 nga Hamasi.
Më shumë se 38 mijë palestinezë janë vrarë që atëherë, kryesisht gra dhe fëmijë, dhe mbi 87 mijë të tjerë janë plagosur, sipas autoriteteve lokale shëndetësore.
Mbi tetë muaj pas fillimit të luftës izraelite, pjesë të mëdha të Gazës janë në gërmadha, krahas një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë (GJND), e cila në vendimin e saj të fundit urdhëroi Tel Avivin të ndalonte menjëherë operacionin e tij në Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj./aa
