Balerina Michaela Mabinty DePrince, e cila performoi me Beyoncé dhe u pa nga shumë njerëz si pioniere, ka vdekur në moshën 29-vjeçare.
Sipas mediave te huaja, një zëdhënës e njoftoi vdekjen e saj në faqen e saj personale në Instagram dhe në një deklaratë familja e saj tha se ajo ishte një “frymzim i paharrueshëm për të gjithë ata që e njihnin ose dëgjuan historinë e saj”.
Shkaku i vdekjes ende nuk është bërë i ditur. DePrince bëri një udhëtim të jashtëzakonshëm nga vuajtja si jetim në Sierra Leone të shkatërruar nga lufta, deri në vlerësime të shumta në botën e kërcimit ndërkombëtar.
Familja e saj tha se vdekja e saj ishte “e papritur”, duke shtuar: “Michaela preku kaq shumë jetë në të gjithë botën, duke përfshirë edhe tonat”.
Në homazhet që u zhvilluan për të, morën pjesë edhe personazhe të tjerë nga bota e baletit.
“Pavarësisht se i thanë se ‘bota nuk ishte gati për balerinat e zeza’ ose se ‘te balerina e zezë nuk ia vlente të investohej’, ajo mbeti e vendosur, e fokusuar dhe filloi të bënte hapa të mëdhenj”, shkroi balerina amerikane Misty Copeland në mediat sociale.
E lindur në Kenema, Sierra Leone, në vitin 1995, DePrince u dërgua në një jetimore në moshën tre vjeçare pasi të dy prindërit e saj vdiqën gjatë luftës civile.
Ajo ka folur në të kaluarën se si shihej si një “fëmijë djalli” në jetimore, sepse vuante nga vitiligo, një gjendje në të cilën pjesët e lëkurës humbasin pigmentin.
Por ajo u adoptua në moshën katër vjeçare nga një çift amerikan dhe u transferua në New Jersey. Nëna e saj adoptuese e vuri re shpejt fiksimin e saj me baletin dhe e regjistroi atë në klasa.
Ajo u bë e famshme pasi mbaroi shkollën e mesme dhe bëri histori si kërcimtarja më e re kryesore në Teatrin e Vallëzimit të Harlemit.
DePrince ka performuar në të gjithë botën, duke përfshirë edhe video-albumin e Beyonce-s “Lemonade”.
Ajo iu bashkua Baletit prestigjioz të Bostonit si soliste e dytë në vitin 2021 dhe luajti në shfaqjen televizive Dancing with the Stars kur ishte vetëm 17 vjeç./EuroNews
