Në Agropoli të Italisë, u zhvillua Festivali i Folklorit dhe Paqes, edicionin e 11-të të cilit e fitoi Ansambli i Bashkisë Prrenjas.
Përfaqësuesi i grupit të artistëve shqiptarë, Ardit Facja, u shpreh për mediet italiane se ndiheshin të nderuar të përfaqësonin Shqipërinë në këtë aktivitet, ku ata si grup i ri që janë, shkuan edhe për t’u argëtuar.
Vallja e famshme e Rrajcës nuk i ka lënë indiferentë të pranishmit, si dhe mediet e vendeve fqinje. Ansambli i Prrenjasit performoi disa valle, por ajo që u vlerësua nga juria ishte vallja e Rrajcës.
Organizatorët e këtij festivali thanë se mesazhi që ky aktivitet u jep të rinjve është se, pa kulturën dhe traditat të cilat janë rrënjët tona, nuk mund të vazhdohet përpara.
Festivali, tashmë i kthyer në traditë, ecën përpara në sajë të vlerave që promovon, paqes dhe marrëdhënieve ndërkulturore në rajon./ata
