Ministri i Industrisë dhe Teknologjisë të Türkiyes, Mehmet Fatih Kacır deklaroi se Alper Gezeravcı do të jetë astronauti i parë i Türkiyes që do të niset për misionin e parë hapësinor në orën 01:11 të natës ndërmjet 17 dhe 18 janarit.

Kacır mori pjesë në ceremoninë e nënshkrimit të thirrjes për ekosistemin e inteligjencës artificiale të mbajtur në TÜBİTAK Marmara Teknokent në lagjen Gebze të Kocaelit dhe më pas dha deklarata për media.

Kacır deklaroi se ata morën pjesë në program me rastin e thirrjes së ekosistemit të Inteligjencës Artificiale 2023 dhe se mandatin e kaluar ata themeluan Institutin Kombëtar të Inteligjencës Artificiale të Türkiyes nën ombrellën e TÜBİTAK.

Ai thekson se e shohin punën në fushën e inteligjencës artificiale si shumë të vlefshme. Kacır shpjegoi se synojnë të prodhojnë vlera veçanërisht nga të dhënat e mëdha, duke vazhduar kështu të mbështesin projektet që synojnë zhvillimin e produkteve dhe shërbimeve me vlerë të shtuar në shumë fusha nga bujqësia, energjia, shëndeti dhe transporti.

Kacır thotë se u japin përparësi projekteve të bashkëpunimit të universiteteve me kompanitë e sektorit privat, startup-et që zhvillojnë teknologji, sipërmarrjet teknologjike dhe kompanitë e mëdha.

"Në këtë kontekst, vazhdojmë thirrjet e ekosistemit të inteligjencës artificiale TÜBİTAK. Sot mbajtëm ceremoninë e nënshkrimit të thirrjes së dytë të sektorit privat. TÜBİTAK do të kontribuojë me më shumë se 50 milionë lira (rreth 1.5 milion euro) për 17 projekte të tjera. Në javët e ardhshme, shpresojmë të shpallim rezultatet e thirrjes sonë për inteligjencën artificiale publike, veçanërisht për hapjen e të dhënave të mëdha publike për zhvilluesit e inteligjencës artificiale dhe duke zhvilluar kështu zgjidhje me vlerë të shtuar", tha ai.

- "Çdo gjë po shkon mirë"

Duke iu referuar udhëtimit hapësinor të astronautit të parë turk Alper Gezeravcı, ministri Kacır tha: "NASA njoftoi orën dje. Në orën 01:11 të natës ndërmjet 17 dhe 18 janarit, sipas orës së Türkiyes, Alper Gezeravcı u nis për misionin tonë të parë hapësinor me njerëz. Nga dje ka filluar periudha e karantinës 14-ditore".

Kacır tha se me Gezeravcı komunikojnë çdo ditë dhe se gjithçka po shkon mirë.

"Astronauti ynë i parë mori trajnim të gjerë. Në të njëjtën kohë, ai përfundoi përgatitjet për 13 eksperimentet shkencore që do të kryhen në stacionin ndërkombëtar hapësinor, së bashku me qendrat tona kërkimore në universitetet tona në Türkiye. Shpresojmë që ky udhëtim do të japë kontribut të rëndësishëm në literaturën ndërkombëtare shkencore, do të jetë moment historik i rëndësishëm në studimet hapësinore të Türkiyes dhe burim i madh frymëzimi për brezat e ardhshëm", tha Kacır duke shtuar:

"Do të vazhdojmë të ndjekim misionet tona hapësinore. E përkufizojmë këtë projekt si misionin e parë hapësinor. Po bëjmë diçka që nuk e kemi bërë në të kaluarën dhe kemi vullnetin për ta vazhduar atë në periudhën e ardhshme".

Duke kujtuar se presidenti Recep Tayyip Erdoğan ndau Programin Kombëtar të Hapësirës me publikun botëror në vitin 2021, Kacır potencoi se presidenti ia shpalli qëllimet e këtij programi si Türkiyes ashtu edhe botës.

Sipas tij, një nga projektet e rëndësishme të këtij programi është realizimi i misionit hapësinor me njerëz. "Ne jemi të nderuar të ndërmarrim një tjetër projekt në Programin tonë Kombëtar të Hapësirës. Shpresoj ta përfundojmë këtë mision, i cili do të kryhet për 14 ditë dhe kështu të bëjmë një hap të parë në punimet hapësinore të Türkiyes", tha Kacır./aa