Grupi jemenas Houthi njoftoi sot se të gjitha interesat amerikano-britanike janë bërë objektiva legjitime të forcave të tij pas agresionit të drejtpërdrejtë dhe të hapur kundër Jemenit.
Në deklaratën e Këshillit të Lartë Politik të Houthive thuhet se "agresioni tinëzar dhe flagrant amerikano-britanik të cilit i është nënshtruar kombi është i paligjshëm dhe i pajustifikuar".
Houthit u zotuan se "të gjitha interesat amerikano-britanike tani janë objektiva legjitime të forcave të armatosura jemenase në përgjigje të agresionit të tyre të drejtpërdrejtë dhe të hapur kundër Republikës së Jemenit".
Më herët, agjencia e lajmeve Saba, e lidhur me Houthit, njoftoi se avionët amerikanë dhe britanikë kryen sulme ajrore në provincat Sana dhe Al-Hudaydah, Sa'ada dhe Dhamar.
Sulmet erdhën disa orë pasi udhëheqësi i grupit Houthi të Jemenit, Abdul-Malik al-Huthi, paralajmëroi se kushdo që rrezikon aksion ushtarak kundër vendit të tij do të paguajë një çmim, duke theksuar se çdo agresion i SHBA-së "kurrë nuk do të mbetet pa përgjigje"./aa
