Hamasi, grupi i rezistencës palestineze, dënoi fushatën e Izraelit kundër institucioneve të OKB-së, duke e quajtur atë “akuzë të zbrazët” që synon t’i pengojë ata të ofrojnë ndihmë për njerëzit në Rripin e Gazës, “të cilët po i nënshtrohen gjenocidit”.
“E fundit është akuza e zbrazët kundër Organizatës Botërore të Shëndetësisë për atë që Izraeli e quajti marrëveshje të fshehtë me lëvizjen Hamas, duke përsëritur pretendimin e rremë për përdorimin e spitaleve nga lëvizja në operacione ushtarake”, tha Hamasi në një deklaratë.
Grupi i rezistencës palestineze dënoi gjithashtu akuzat e Izraelit kundër Agjencisë së Kombeve të Bashkuara për Ndihmë dhe Punë për Refugjatët Palestinë në Lindjen e Afërt (UNRWA) me qëllim “ndërprerjen e financimit të saj dhe privimin e popullit tonë nga e drejta e tyre për shërbimet e këtyre agjencive ndërkombëtare”.
Izraeli ka pretenduar se Hamasi po përdor spitalet në Rripin e Gazës për qëllime ushtarake për të justifikuar sulmet dhe bombardimet ndaj tyre, edhe pse ata strehojnë njerëz të zhvendosur, ndërsa lëvizja e rezistencës palestineze i ka mohuar vazhdimisht akuzat e tilla.
Hamasi u bëri thirrje Kombeve të Bashkuara dhe institucioneve ndërkombëtare “të mos dorëzohen para kërcënimeve dhe shantazheve izraelite”.
Grupi theksoi “rëndësinë e rolit të këtyre agjencive në ofrimin e ndihmës për popullin tonë dhe dokumentimin e krimeve të okupacionit (izraelit)”.
OBSH-ja hodhi poshtë të premten akuzat e Izraelit për “bashkëpunim të fshehtë” me Hamasin dhe “mbylljen e syve” ndaj vuajtjeve të pengjeve izraelitë në Gaza.
Që nga 7 tetori, të paktën 220 shkelje nga Izraeli kundër institucioneve të drejtuara nga OKB-ja janë dokumentuar në Gaza.
Izraeli ka kryer sulme intensive ajrore dhe tokësore në Rripin e Gazës që nga një sulm ndërkufitar i Hamasit, në të cilin Tel Avivi thotë se u vranë 1.200 njerëz.
Të paktën 26.257 palestinezë, kryesisht gra dhe fëmijë, janë vrarë që atëherë dhe 64.797 janë plagosur, sipas autoriteteve shëndetësore palestineze./aa
