Kompania ajrore gjermane Lufthansa anuloi qindra fluturime për shkak të grevës njëditore të stafit të saj tokësor në aeroportet kryesore të vendit.
Greva filloi në ora 4:00 të mëngjesit me orën lokale dhe ishte planifikuar të vazhdonte deri në orën 7:10 të mëngjesit, në aeroportet e Frankfurtit, Mynihut, Berlinit, Hamburgut dhe Dyseldorfit, duke prekur mbi 100 mijë pasagjerë.
Lufthansa tha se u detyrua të anulonte rreth 80 për qind të fluturimeve të planifikuara për të mërkurën, duke shtuar se pasagjerët që u prekën nga anulimet e fluturimeve u informuan me email ose nëpërmjet aplikacionit të tyre.
“Ju lutemi, në aeroport ejani vetëm nëse fluturimi juaj nuk është anuluar. Për shkak të grevës, për fat të keq në sportelet e riprenotimit nuk ka personel”, thuhet në deklaratën e Lufthansa-s, duke shtuar se fluturimet e anuluara mund të rezervohen në faqen e internetit të kompanisë.
Në mosmarrëveshjen e vazhdueshme të negociatave kolektive, sindikata Verdi po kërkon një rritje prej 12.5 për qind dhe jo më pak se 500 euro rritje mujore të pagave për rreth 25 mijë personel në terren, dhe një bonus të njëhershëm prej 3 mijë euro për të kompensuar koston e krizës së jetesës./aa
