Një gjykatë në Itali ka dënuar priftin katolik Giuseppe Rugolo me katër vjet e gjysmë burg për dhunë seksuale ndaj të miturve, raportojnë mediat lokale.
Procedurat ligjore u nisën pas një ankese të paraqitur nga Antonio Messina, tani 30 vjeç, i cili akuzoi Rugolon se e kishte nënshtruar atë ndaj dhunës midis viteve 2009 dhe 2013, sipas agjencisë së lajmeve ANSA.
Pas një shqyrtimi të kujdesshëm, gjykata në qytetin Enna në ishullin e Siçilisë e shpalli Rugolon fajtor për abuzim seksual të fëmijëve.
Rugolos gjithashtu i është ndaluar përgjithmonë mësimdhënia në shkollë dhe mbajtja e posteve publike për pesë vjet.
Në vitin 2020, Messina i shkroi një letër Papa Françeskut, duke raportuar abuzimin dhe duke kërkuar drejtësi, dhe më pas e raportoi atë tek organet e zbatimit të ligjit.
Rugolo u arrestua fillimisht në vitin 2021 pas akuzave ndaj tij dhe më pas u vendos në arrest shtëpiak./aa
