Ushtria izraelite publikoi një video të bastisjes në spitalin Al-Shifa, që ndodhet në perëndim të qytetit të Gazës.
Ushtria izraelite njoftoi dje në mëngjes se forcat e saj kishin sulmuar spitalin Al-Shifa, ku strehohen mijëra palestinezë të sëmurë dhe të plagosur, si dhe njerëz të zhvendosur.
Siç raportoi shërbimi publik izraelit KAN në atë kohë, rreth 80 palestinezë u ndaluan brenda objektit.
Në mesin e të arrestuarve ishin edhe disa gazetarë, një pjesë e të cilëve u liruan pas 12 orësh.
Izraeli ka zhvilluar një ofensivë ushtarake vdekjeprurëse në Gaza që nga sulmi ndërkufitar i Hamasit më 7 tetor 2023. Që atëherë, në Gaza janë vrarë më shumë se 31.700 palestinezë, kryesisht gra dhe fëmijë, ndërsa rreth 73.800 të tjerë janë plagosur.
Sipas OKB-së, lufta izraelite ka zhvendosur 85 për qind të popullsisë së Gazës, mes një bllokade shkatërruese të produkteve ushqimore, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar.
Izraeli akuzohet për gjenocid në Gjykatën Ndërkombëtare të Drejtësisë (GJND). Një vendim i përkohshëm në janar urdhëroi Tel Aviv-in të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza./aa
