Deputeti britanik Richard Burgon i bëri thirrje qeverisë të nisë një hetim për vrasjen e punonjësve të ndihmës humanitare nga Izraeli në Rripin e Gazës, duke thënë se sulmi është një dëshmi që Britania "duhet të pezullojë menjëherë shitjet e armëve në Izrael".
Në një letër drejtuar Sekretarit të Jashtëm David Cameron, deputeti laburist kërkoi që qeveria të nisë menjëherë një hetim të plotë nëse armët e furnizuara nga Britania e Madhe janë përdorur në sulmin ajror izraelit në Gaza të hënën që vrau shtatë punonjës humanitarë të organizatës ushqimore World Central Kitchen (WCK), duke përfshirë tre shtetas britanikë.
Gjatë ditës së djeshme, WCK konfirmoi se shtatë nga punonjësit e saj humanitarë u vranë në një sulm ajror izraelit në Rripin e Gazës.
Punëtorët ishin shtetas të Australisë, Polonisë, Britanisë së Madhe dhe Palestinës, si dhe një person me shtetësi të dyfishtë SHBA-Kanadë.
"Ky sulm nënvizon edhe një herë pse Mbretëria e Bashkuar duhet të pezullojë menjëherë shitjet e armëve për Izraelin, duke pasur parasysh rolin që mund të luajnë këto sulme vdekjeprurëse në Gaza dhe madje edhe në krimet e luftës të kryera nga qeveria izraelite", tha deputeti Richard Burgon.
Pas sulmit, organizata humanitare WCK njoftoi se po ndalonte operacionet në rajon.
Burgon tha se që nga viti 2015, Mbretëria e Bashkuar ka licencuar rreth 600 milionë dollarë eksporte ushtarake në Izrael, duke përfshirë komponentë për avionë luftarakë, raketa, tanke, teknologji, armë të vogla dhe municione.
"Mbretëria e Bashkuar siguron afërsisht 15 për qind të komponentëve në aeroplanët bombardues F-35 që përdoren aktualisht për të hedhur bomba pa bërë dallim në Gaza", kujtoi ai, duke theksuar se "ky është gjithashtu incidenti i fundit ku eksportet ushtarake të Mbretërisë së Bashkuar mund të jenë përdorur në sulme ndaj shtetasve britanikë”.
Ai edhe muajin e kaluar shkroi një letër duke bërë thirrje për një hetim nëse komponentët ushtarakë të furnizuar nga Britania e Madhe ishin përdorur në bombardimin izraelit të një kompleksi ku strehoheshin mjekët britanikë që ishin vullnetarë në Gaza.
"Qeveria juaj ka përgjegjësinë të prodhojë një hetim të shpejtë dhe transparent për të dy incidentet për të përcaktuar nëse eksportet e armëve të Mbretërisë së Bashkuar po përdoren në sulmet ndaj shtetasve britanikë dhe për t'ia paraqitur këtë urgjentisht Parlamentit", shtoi ai.
Përveç vrasjes së afro 33 mijë njerëzve që nga 7 tetori, ofensiva izraelite dhe rrethimi i Rripit të Gazës ka shkaktuar kushtet pothuajse të urisë në mesin e mbi 2 milionë palestinezëve./aa
