24 nxënës në Ostren, nga parashkollori deri në klasën e nëntë, prej dy ditësh kanë bojkotuar mësimin në shenje proteste, pasi Zyra Arsimore e Bulqizës u hoqi furgonin që i transportonte në shkollë. Prindërit janë njoftuar se duhet të kryejnë privatisht transportin e fëmijëve në një distancë 5 kilometra. I pyetur për këtë shqetësim, drejtori i shkollës së mesme të bashkuar “Eles Koçi” tha për Report tv se është i detyruar të zbatojë Vendimin e Këshillit të Ministrave, që është përcjelle nga Zyra Arsimore.  

“Kemi një vendim të këshillit të ministrave të vitit 2023, që të gjithë ata nxënës që jetojnë brenda qendrës së banimit, edhe se janë mbi 2 km nuk e përfitojnë të drejtën e transportit, pavarësisht distancës”, u shpreh Çlirim Muça, drejtori i shkollës.

Prindërit të revoluar thanë se e kanë të pamundur të sigurojnë privatisht transportin për shkak të gjendjes së vështirë ekonomike. Nëse lidhin kontratë private me furgonat, pagesa është 3300 lek/muaj për fëmijë. Por ka familje që kanë 3-4 fëmijë dhe të ardhurat e tyre mujore janë të ulta. Po kaq shprehen se është e vështirë që të vegjlit të përshkojnë 5 kilometra në këmbë, për shkak të terrenit malor.

“Unë kam 4 fëmijë dhe jetoj me ndihmë ekonomike. Me çfarë ta paguaj furgonin? Rrugën në këmbë nuk e bëjnë dot se është 1 orë larg”.  

“Fëmijët e lagjes Guri s’kanë mundësi të shkojnë në Ostren. Unë si kryetar fshati i kam çuar ankesat në çdo institucion. Kanë firmos të gjithë prinderit peticionin. Fëmijët s’do shkojnë në shkollë pa u vendos furgoni. Kërkojmë ndihmë nga shteti se do mbeten fëmijët analfabet”.

“Është gjynah se nga këtu e deri në shkollë është 1 orë në këmbë, si do shkojë fëmija i klasës së parë. Po nuk erdhi furgoni t’i marrë ne do t’i mbajmë në shtëpi”.

Gjatë dimrit mund tu rrezikohet jeta për shkak të vërshimit të përrenjve malor, tha drejtori i shkollës, i cili ka vendosur dijeni Zyrën Arsimore për vështirësitë, pavarësisht se në këtë moment është i detyruar të zbatojë vendimin e Qeverisë.

“Rruga është e vështirë sidomos kur të nisin shirat, shpresoj që të gjendet zgjidhje. Fëmijëve u rezikohet jeta se ka përrenj të rrëmbyeshëm".

Jashtë kamerave Zyra Arsimore e Bulqizës tha se lagjet “Guri” dhe “Zaboxhe” janë pjesë e njësisë vendore Ostren, ndërsa vendimi i qeverisë parashikon transport falas për nxënësit jashtë qendrës së banimit./Shqiptarja