Shoqata “Tirana” organizoi në datën 10 maj aktivitetin “Sofra Tiranase” një nga eventet më të rëndësishme që feston kulturën dhe traditën popullore të Tiranës, e cila ka arritur një tjetër moment historik me shënimin e 30-vjetorit të saj.
Në këtë edicion jubilar, Shoqata “Tirana” ka organizuar një festë me këngë dhe valle, ku pjesëmarrësit kanë pasur mundësinë të shijojnë performancat e artistëve dhe ansambleve të njohura, si dhe të përjetojnë hijeshinë e kostumeve tradicionale.
Në këtë mbrëmje ishin të pranishëm, Presidenti i Republikës, Bajram Begaj, ish-presidenti i Republikës, Bamir Topi nënkryetari i bashkisë së Tiranë, Andi Seferi, si dhe shumë figura të shquara të politikës, artit, kulturës, si dhe të familjeve të vjetra të kryeqytetit.
Ky jubile u festua me një ngjarje të veçantë që u mbajt në ish-Pallatin e Kongreseve. Aktiviteti vazhdon të jetë një dritare ku shfaqen aspektet më të bukura të muzikës dhe valleve popullore të trevës së Tiranës, duke sjellë artistët më në zë dhe vallet më të dashura të kësaj zone.
Ky aktivitet ishte një mundësi e shkëlqyer për të kujtuar dhe vlerësuar thellësinë e kulturës së Tiranës dhe për të kaluar një mbrëmje nën ritmet e muzikës që ka rezonuar brez pas brezi.
Është një testament i pasurisë kulturore që Tiranës dhe Shqipërisë i takon, dhe një dëshmi e fortë e lidhjes së njerëzve me rrënjët e tyre.
Kryetari i bashkisë së Tiranës, Erion Veliaj e cilësoi këtë event si “tradita që i duhen Tiranës sonë”.
“Një mbrëmje magjike plot emocione, këngë e valle na dhuroi “Sofra Tiranase” në 30 vjetorin e saj. Këngëtarët më në zë të muzikës tironse elektrizuan Pallatin e Kongreseve me zërat e tyre”, u shpreh Veliaj në një postim në rrjetet sociale./ata
