Raportohet se qeveria izraelite hodhi poshtë vendimin e miratuar nga Asambleja e Përgjithshme e Kombeve të Bashkuara (OKB), e cila kërkonte që të ri-negociohej anëtarësimi i Palestinës në OKB dhe t'i jepeshin disa të drejta shtesë Palestinës që ka statusin e vëzhguesit.
Në deklaratën me shkrim të Zyrës së Shtypit izraelit, thuhet se propozimi i kryeministrit Benjamin Netanyahu për të refuzuar rezolutën palestineze të miratuar nga Asambleja e Përgjithshme e OKB-së është vënë në votim të qeverisë izraelite.
Thuhet se qeveria izraelite e pranoi njëzëri propozimin e kryeministrit Netanyahu.
Gjithashtu Netanyahu tha se nuk do të lejojnë krijimin e një shteti palestinez.
"As Asambleja e Përgjithshme e OKB-së dhe asnjë institucion tjetër, askush nuk mund të na pengojë ose të pengojë Izraelin që të ushtrojë të drejtën e tij themelore për vetëmbrojtje", tha Netanyahu në deklaratë.
Më 10 maj, në votimin e mbajtur në Asamblenë e Përgjithshme të OKB-së u pranua rezoluta që kërkon që anëtarësimi i Palestinës në OKB të ri-negociohet në Këshillin e Sigurimit të OKB-së dhe t'i jepen disa të drejta shtesë Palestinës që ka statusin e vëzhguesit.
Në vendim theksohet se “Palestina përmbush kriteret për anëtarësim në OKB në përputhje me nenin 4 të Kartës së OKB-së dhe për këtë arsye duhet të pranohet si anëtare e OKB-së”.
Palestina aplikoi për anëtarësim të plotë në OKB në vitin 2011, por nuk mori mbështetjen e nevojshme në KS të OKB-së, ndërsa në vitin 2012 ajo fitoi "statusin e vëzhguesit të përhershëm" në OKB./aa
