Deklarata përfundimtare e samitit për paqen në Ukrainë në Zvicër nuk është mbështetur nga të gjitha shtetet pjesëmarrëse.
Sipas një liste të publikuar të dielën nga mikpritësit zviceranë, dokumenti u miratua vetëm nga 80 nga 93 shtetet pjesëmarrëse në mbyllje të ngjarjes dyditore.
Vendet që nuk e mbështetën deklaratën përfshijnë gjashtë shtete nga grupi G20 i fuqive më të rëndësishme ekonomike në botë, Brazili, Meksika, Arabia Saudite, Afrika e Jugut, India dhe Indonezia.
Armenia, Bahreini, Tajlanda, Libia, Emiratet e Bashkuara Arabe, Kolumbia dhe Vatikani gjithashtu bënë të njëjtë gjë.
Ndërkohë, kancelari gjerman Olaf Scholz u shpreh në favor të përfshirjes së Rusisë në një proces paqeje për Ukrainën.
“Është e vërtetë se paqja në Ukrainë nuk mund të arrihet pa përfshirë Rusinë”, deklaroi Scholz në konferencën e paqes në Zvicër.
Në të njëjtën kohë, ai i bëri thirrje Rusisë që të tërhiqet plotësisht nga Ukraina e pushtuar pjesërisht.
“Rusia mund t’i japë fund kësaj lufte sot ose në çdo kohë nëse ndalon sulmet e saj dhe tërheq trupat e saj nga Ukraina”, shtoi Scholz.
Rusia deri më tani ka refuzuar të dëgjojë thirrjen për paqe në bazë të së drejtës ndërkombëtare dhe Kartës së OKB-së.
Sipas ministrit të Jashtëm ukrainas Dmytro Kuleba, konferenca si e tillë solli përparim të rëndësishëm.
Kuleba tha se të gjitha vendet që nuk ishin të pranishme ishin gjithashtu të vetëdijshme për shtysën e dhënë nga takimi.
”Në përgjithësi, procesi që është nisur është shumë i mirëpritur. Ne jemi në rrugën e duhur”, tha ai.
Kuleba theksoi përsëri nevojën për të mbështetur Ukrainën ushtarakisht me armët më cilësore të mundshme.
”Sa më e fortë të jetë Ukraina, aq më e gatshme do të jetë Moska për të negociuar paqen”, sipas tij.
Qëllimi i ngjarjes ishte inicimi i një procesi paqeje në të cilin edhe Rusia do të përfshihej në planin afatgjatë.
Zyrtarët nga Moska nuk u ftuan me këtë rast dhe as nuk shprehën dëshirën për të marrë pjesë./ata