Këshilli Kombëtar i Integrimit Evropian (KKIE) organizoi sot një takim ndërgjegjësues mbi rolin që luan Kuvendi i Shqipërisë në procesin e Integrimit Europian, në të cilën morën pjesë studentë nga Instituti i Studimeve Europiane, Universiteti i Tiranës.
Diskutimi u përqendrua në rolin e Kuvendit jo vetëm në forcimin e rolit mbikëqyrës dhe kontrollues mbi qeverinë në hapat e ndërmarra në procesin e integrimit në BE, por dhe në rolin që luan Këshilli Kombëtar i Integrimit Europian në rritjen e pjesëmarrjes qytetare dhe përfshirjen e sa më shumë aktorëve në njohjen dhe dhënien e kontributit për këtë proces të rëndësishëm.
Takimi u përshëndet nga Elda Zenelaj, drejtore e Sekretariatit Teknik të KKIE-së dhe Migena Leskoviku, përgjegjëse e Departamentit të Legjislacionit dhe Politikave të BE-së në ISE, të cilat në fjalën e tyre theksuan rëndësinë e njohjes sa më mirë të rolit që luan Kuvendi si institucioni që bënë të mundur bashkërendimin me hallkat e tjera në përmbushjen e kushteve dhe detyrimeve të vendosura nga Këshilli Europian, vazhdimin e përafrimit të legjislacionit të Shqipërisë me “acquis”, si dhe afrimin e shoqërisë civile dhe palëve të tjera të interesuara për t’u përfshirë në proces.
Elda Zenelaj, i njohu studentët më konkretisht me ndryshimet ligjore për shtimin e rolit të Kuvendit për mbikëqyrjen e procesit tashmë që negociatat janë hapur zyrtarisht, rolin e Komisionit për Çështjet Europiane në monitorimin e përafrimit të legjislacionit me “acquis” të BE-së, rolit kontrollues të KKIE në përmbushjen e detyrimeve dhe ndjekjen e rekomandimeve të lëna në progres raportet e KE, të Kuvendit y funksionet e Kuvendit dhe në procesin e integrimit dhe negociatave me BE-në, punën e bërë nga Sekretariati i KKIE për përfshirjen e sa më shumë target grupeve në proces dhe diskutimin e çështjeve të procesit të integrimit në të gjitha fushat, procedurat për shqyrtimin e pozicioneve negociuese, rolin e OSHEC-së dhe përfshirjen e tyre në KKIE, etj.
Më pas Zenelaj iu përgjigj pyetjeve të ndryshme të studentëve./ata
