Një aeroplanmbajtëse amerikane me energji bërthamore u ankorua në Korenë e Jugut sot mes tensioneve të rritura pas një traktati të ri sigurie midis Koresë së Veriut dhe Rusisë.
Anija “USS Theodore Roosevelt” hyri në bazën detare në Busan, 320 kilometra në juglindje të kryeqytetit Seul, sot herët, së bashku me shkatërruesin e pajisur me Aegis “USS Halsey” dhe “USS Daniel Inouye”, raportoi Yonhap News me bazë në Seul, duke cituar Marinën e Koresë së Jugut.
Kjo shënoi mbërritjen e parë të një aeroplanmbajtëse amerikane në Korenë e Jugut në shtatë muaj, që nga vizita e “USS Carl Vinson” në nëntor.
Hapi erdhi pasi të tri vendet pritet të zhvillojnë stërvitjen e tyre të parë trepalëshe në shumë fusha, të quajtur “Freedom Edge”, më vonë këtë muaj mes përpjekjeve të përbashkëta për të forcuar bashkëpunimin e sigurisë kundër kërcënimeve të Koresë së Veriut.
Tre aleatët vendosën të nisin stërvitjen gjatë bisedimeve trepalëshe të mbajtura në margjinat e konferencës së sigurisë “Dialogu Shangri-La” në fillim të këtij muaji në Singapor.
Të mërkurën, Koreja e Veriut dhe Rusia nënshkruan një marrëveshje të re partneriteti pas një samiti në Phenian midis liderëve të dy vendeve, duke u zotuar se do t’i ofrojnë njëri-tjetrit ndihmë ushtarake “pa vonesë” nëse njëri prej tyre sulmohet nga një vend i tretë./aa
