Të paktën katër palestinezë u vranë në një sulm ajror izraelit në një qendër trajnimi të OKB-së në perëndim të qytetit të Gazës sot, thanë burime mjekësore.
Sipas dëshmitarëve, avionët luftarakë goditën selinë e Kolegjit të Trajnimit Profesional të Agjencisë së OKB-së për Refugjatët Palestinë (UNRWA).
Në vend u raportuan dëme të mëdha.
Të paktën 60 persona u vranë në sulmet brutale izraelite në Rripin e Gazës në 24 orët e fundit, sipas burimeve mjekësore palestineze.
Duke shpërfillur një rezolutë të Këshillit të Sigurimit të OKB-së që kërkon armëpushim të menjëhershëm, Izraeli ka vazhduar ofensivën e tij brutale në Gaza që nga sulmi i 7 tetorit 2023 nga grupi palestinez Hamas.
Mbi 37.500 palestinezë janë vrarë që atëherë në Gaza, shumica prej tyre gra dhe fëmijë, dhe më shumë se 86.000 të tjerë janë plagosur, sipas autoriteteve lokale shëndetësore.
Mbi tetë muaj pas fillimit të luftës izraelite, pjesë të mëdha të Gazës janë në gërmadha, krahas një bllokade gjymtuese të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit e urdhëroi atë të ndalonte menjëherë operacionin e tij në qytetin jugor Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj./aa
