Kina ka ndryshuar emrat e qindra fshatrave në rajonin e Xinjiang me qëllim të fshirjes së kulturës myslimane ujgure, sipas organizatës për të drejtat e njeriut Human Rights Watch (HRW).
Raporti i HRW tha se emrat e qindra fshatrave të lidhura me fenë, historinë ose kulturën ujgure u ndryshuan midis 2009 dhe 2023.
Fjalë të tilla si “sulltan”, “altar”, “hoxha”, “bej” zhduken nga emrat e vendeve dhe zëvendësohen me terma që pasqyrojnë ideologjinë e Partisë Komuniste si “harmonia” dhe “lumturia”, sipas raportit të bazuar mbi të dhënat e publikuara nga autoritetet kineze.
Në vitet e fundit, autoritetet kineze kanë riorganizuar rrënjësisht shoqërinë në Xinjiang në një përpjekje për të asimiluar popullsinë minoritare ujgure në kulturën kineze, shkruan BBC.
Studiuesit nga HRW dhe organizata norvegjeze Uyghur Hjelp studiuan emrat e fshatrave në Xinjiang nga faqja e internetit e Byrosë Kombëtare të Statistikave të Kinës për një periudhë 14-vjeçare.
Ata zbuluan se emrat e 3,600 nga 25,000 fshatrat e Xinjiang ishin ndryshuar gjatë kësaj kohe.
Sipas HRW, ndërsa shumica e këtyre ndryshimeve janë “në dukje të zakonshme”, rreth një e pesta, ose 630 ndryshime, heqin referencat ndaj fesë, kulturës ose historisë ujgure.
Shkeljet sistematike të të drejtave të Ujgurëve
Ata përmendën shembullin e fshatit Aq Meschit (“xhamia e bardhë”) në qarkun Akto në Xinjiang jugperëndimor, i cili u riemërua Unity në 2018.
Një numër në rritje i provave tregojnë për shkelje sistematike të të drejtave të njeriut kundër popullsisë myslimane ujgure në Kinë, të cilat Pekini e mohon.
Ka rreth 20 milionë myslimanë në Kinë.
Edhe pse Kina është zyrtarisht një vend ateist, autoritetet thonë se janë tolerante ndaj lirisë fetare.
Megjithatë, vitet e fundit, shumë që ndjekin ngjarjet në Kinë thonë se kanë qenë dëshmitarë të një goditjeje ndaj fesë së organizuar në të gjithë vendin. /tesheshi.com/
