Sekretarja e Përgjithshme e RCC-së, Majlinda Bregu në panelin e hapjes së Konferencës të Nivelit të Lartë të OECD-së për Evropën Juglindore

Paris – Sekretarja e Përgjithshme e Këshillit të Bashkëpunimit Rajonal (RCC), Majlinda Bregu, nënvizoi rëndësinë e iniciativave rajonale për rritjen ekonomike, përmes nxitjes së konkurrueshmërisë mes vendeve të Ballkanit Perëndimor, në Konferencën e Nivelit të Lartë për Evropën Juglindore të OECD-së, “Driving Competitiveness, Achieving Convergence”, në Paris.

“Ballkani Perëndimor është një rajon shumë i ndryshëm nga ai i 10 viteve më parë. Bashkëpunimi rajonal u dëshmua si një anije e sigurt në një stuhi, ku 80% e qytetarëve e mbështesin plotësisht. Por duke qenë se rajoni është ende i mbushur me tensione, potenciali i tij i plotë ende nuk është shfrytëzuar. Ndaj zbatimi i plotë i angazhimeve të marra, është një domosdoshmëri e vështirë! Ngërçet dhe bllokimet e vazhdueshme nuk janë më të përballueshme. Faza e re e Tregut të Përbashkët Rajonal, një proces me pronësi rajonale, është në përgatitje e sipër. Ndonëse mund të mos e ndryshojë të gjithë situatën në rajon, do ta afrojë rajonin, duke ndjekur me shpejtësi konvergjencën shumë të nevojshme”, tha Bregu.

Krahas Bregut, sesioni hapës mblodhi folës të nivelit të lartë, duke përfshirë Péter Szijjártó, Ministër i Punëve të Jashtme dhe Tregtisë së Hungarisë, Zdenko Lucić, Sekretar i Shtetit për Tregtinë e Jashtme dhe Bashkëpunim Zhvillimor në Ministrinë e Punëve të Jashtme dhe Evropiane të Kroacisë, Mathieu Bousquet, Drejtor në Drejtorinë e Përgjithshme të Komisionit Evropian për Fqinjësinë dhe Negociatat e Zgjerimit (NEAR) dhe Carlo Monticelli, Guvernator i Bankës për Zhvillim të Këshillit të Evropës
“Ballkanit Perëndimor i mungon besimi në fuqinë që kanë lidhjet ekonomike dhe tregtare të rajonit. Të dhënat ende të pabotuara të Opinionit të Biznesit të Barometrit Ballkanik zbulojnë dy pengesa kryesore që sjellin një perceptim të tillë: mungesa e fuqisë punëtore dhe ikja e trurit. Por ka një mundësi. Mjedisi mbështetës mund të nxisë rritjen vjetore me 2%, të tërheqë deri në 6.5% më shumë investime, të rrisë shkallën e rritjes së vendeve të punës deri në 1% në vit dhe të rrisë produktivitetin e SME-ve me 5% deri në 10%. Inkurajimi i lëvizjes së lirë të fuqisë punëtore në të gjithë Ballkanin Perëndimor sjell mundësi për të shtuar një 1.3% të konsiderueshëm në PBB-në tonë deri në vitin 2025. Sikur çdo gjë të shkojë siç duhet, na presin edhe 72 vite për të pasur nivelin e sotëm të zhvillimit të BE-së”, shtoi Bregu.

Znj. Bregu theksoi sukseset e integrimit rajonal përmes Tregut të Përbashkët Rajonal si “portë hyrëse” për integrimin progresiv në tregun e vetëm të BE-së dhe potencialin e tij për krijimin e konvergjencës socio-ekonomike të vetëqëndrueshme.

“Ndërsa rajoni përpiqet të shikojë përpara me shpresa disi të lëkundura, ne përballemi me një rënie prej 8% të mbështetjes së qytetarëve për anëtarësimin në BE. Është e qartë se Ballkani Perëndimor ka nevojë për një integrim më të guximshëm dhe më të shpejtë në tregun e vetëm të BE-së dhe një integrim të përshpejtuar plotësisht të operacionalizuar, me parashikueshmëri më të lartë për perspektivën e ardhshme financiare për të mbështetur dinamizmin dhe transformimin e ri për të arritur standarde më të mira jetese dhe konvergjencë. Por në fund të fundit, nuk ka të bëjë vetëm me paratë dhe tregun, ka të bëjë me vlerat dhe gjithashtu me angazhimin tonë për punën e vështirë të reformës, për të luftuar korrupsionin dhe për të ndërtuar një të ardhme të përbashkët”, përfundoi Bregu./Tema