Ministri izraelit i Mbrojtjes, Yoav Gallant, ka deklaruar se Izraeli është "më afër se kurrë më parë" drejt arritjes së një marrëveshjeje të shkëmbimit të të burgosurve me palestinezë.
Sipas kanalit izraelit 12, Gallant u tha familjeve të pengjeve të mbajtura në Gaza se marrëveshja e shkëmbimit të të burgosurve është "më afër se kurrë më parë".
Transmetuesi publik i ushtrisë izraelite KAN tha më herët se kabineti izraelit do të mbajë sonte një seancë për të shqyrtuar përgjigjen e Hamasit ndaj propozimit të armëpushimit në Gaza, që përfshin gjithashtu një marrëveshje për shkëmbimin e të burgosurve.
Ndërkohë, CNN citoi një burim izraelit të njohur me negociatat, duke deklaruar se të dyja palët "duket se janë në prag të një dakordimi kornizë për një marrëveshje armëpushimi dhe lirimin e pengjeve".
Burimi shtoi se zyrtarët izraelitë besojnë se përgjigja e fundit e Hamasit do t'u mundësojë dy palëve të hyjnë në negociata të detajuara për të arritur një marrëveshje finale.
Ndërmjetësuesit kanë dhënë një përgjigje nga Hamasi ndaj një propozimi që do të përfshinte lirimin e pengjeve të mbajtura në Gaza dhe një armëpushim në territor.
Izraeli është duke i vlerësuar vërejtjet dhe do t'ua përcjellë përgjigjen e tij ndërmjetësuesve, thuhet në një deklaratë të lëshuar nga zyra e kryeministrit Benjamin Netanyahu në emër të agjencisë së Mossad.
Grupi Hamas konfirmoi gjithashtu mbrëmë se udhëheqësi Ismail Haniyeh zhvilloi bisedime me zyrtarë të Katarit, Egjiptit dhe Türkiyes për të shqyrtuar zhvillimet në lidhje me një armëpushim në Gaza.
Grupi theksoi se është "angazhuar pozitivisht" me zhvillimet e armëpushimit.
Egjipti, Katari dhe SHBA janë përpjekur për muaj të tërë për të siguruar një armëpushim dhe lirimin e 120 pengjeve të mbetura në Gaza, por pa rezultat.
Hamasi thotë se çdo marrëveshje eventuale duhet t'i japë fund luftës dhe të sjellë një tërheqje të plotë të Izraelit nga Gaza. Izraeli, megjithatë, argumenton se do të pranojë vetëm pauza të përkohshme në luftime dhe dëshiron t'i japë fund aftësive qeverisëse të Hamasit.
Presidenti i SHBA-së, Joe Biden, njoftoi një plan armëpushimi me tre faza në maj, i cili përfshin lirimin gradual të pengjeve izraelitë të mbajtur në Gaza dhe tërheqjen e forcave izraelite. Plani gjithashtu parashikon lirimin e të burgosurve palestinezë dhe rindërtimin e Gazës.
Izraeli, duke shkelur një rezolutë të Këshillit të Sigurimit të OKB-së që kërkon armëpushim të menjëhershëm, është përballur me reagime ndërkombëtare në mes të ofensivës së tij brutale të vazhdueshme në Gaza që nga një sulm i 7 tetorit 2023 nga grupi palestinez Hamas.
Afro 38 mijë palestinezë janë vrarë që atëherë, kryesisht gra dhe fëmijë, dhe rreth 87 mijë të tjerë janë plagosur, sipas autoriteteve lokale shëndetësore.
Mbi tetë muaj pas fillimit të luftës izraelite, pjesë të gjera të Gazës janë në rrënoja, krahas një bllokade të dëmshme ndaj ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, e cila në vendimin e saj të fundit urdhëroi Tel Avivin të ndalonte menjëherë operacionin e tij ushtarak në qytetin jugor Rafah, ku mbi një milion palestinezë kishin kërkuar strehim nga lufta përpara se të pushtohej më 6 maj./aa
