Ministria e Jashtme e Koresë së Jugut u bëri thirrje qytetarëve të saj në Liban dhe Izrael që të largohen sa më shpejt nga këto vende për arsye sigurie, pas zhvillimeve të fundit në Lindjen e Mesme.
Në lajmet e Yonhap u tha se Kang In-sun, një nga zëvendësministrat e Jashtëm të Koresë së Jugut, zhvilloi një takim për të vlerësuar situatën e sigurisë në Lindjen e Mesme dhe për të informuar për masat për mbrojtjen e qytetarëve të Koresë së Jugut në rajon.
"Ne këshillojmë fuqimisht qytetarët e Koresë së Jugut që janë në Liban dhe Izrael që të largohen nga vendet përkatëse sa më shpejt të jetë e mundur duke përdorur fluturimet në dispozicion", tha Kang.
Kang gjithashtu theksoi se misionet e huaja janë paralajmëruar për të garantuar sigurinë e qytetarëve të Koresë së Jugut në një situatë të mundshme.
Ndërkohë, u njoftua se janë rreth 350 shtetas të Koresë së Jugut në Izrael dhe 130 në Liban.
Izraeli, i cili ka vazhduar sulmet e tij në Rripin e Gazës që nga 7 tetori 2023, po përplaset gjithashtu me Hezbollahun libanez në kufirin verior.
Tensioni u rrit më tej pasi Izraeli mbajti Lëvizjen Hezbollah përgjegjëse për sulmin në qytetin Majdel Shams në Lartësitë Golan më 27 korrik./aa