Bashkimi Evropian ka miratuar 1.2 miliardë euro shtesë përmes Kornizës së Investimeve të Ballkanit Perëndimor (WBIF) për përmirësimin e infrastrukturës hekurudhore dhe menaxhimit të ujit.
WBIF njoftoi në faqen e saj të internetit se kjo shumë është menduar më së shumti për modernizimin e hekurudhave me qëllim të rritjes së shpejtësisë së trenave në Serbi dhe për menaxhimin e ujit dhe ndërtimin e infrastrukturës së nevojshme në Bosnje dhe Mal të Zi.
Këtë vit, nisma do të mbështesë gjithsej tetë projekte në furnizimin me ujë, kanalizimet dhe trajtimin e ujërave të zeza dhe transportin hekurudhor, duke përfshirë transformimin e gjelbër të ndërmarrjeve të vogla dhe të mesme.
Deri më tani janë miratuar 17.5 miliardë euro
Korniza e investimeve financohet kryesisht nga BE-ja me kontribute nga shtetet anëtare të Unionit, Norvegjia dhe institucionet financiare ndërkombëtare.
BE-ja ka miratuar deri më tani programe me vlerë 17.5 miliardë euro në zonën e Ballkanit Perëndimor në kuadër të Planit Ekonomik dhe të Investimeve, duke përfshirë 5.4 miliardë euro grante të BE-së.
WBIF është një platformë e përbashkët financiare e nisur 15 vjet më parë, e cila bashkon Komisionin Evropian, organizatat financiare, vendet anëtare të BE-së dhe Norvegjinë, me qëllim përmirësimin e bashkëpunimit në investimet e sektorit publik dhe privat. /tesheshi.com/
