Mijëra protestues kundër racizmit janë mbledhur në qytete dhe qyteza anembanë Anglisë pas një jave trazirash dhe rebelimi kundër emigrantëve.
Grumbullimet në vendet ku priten protesta kundër emigracionit - duke përfshirë Londrën veriore, Bristol dhe Newcastle - ishin kryesisht paqësore, ndërkohë që anti-protestuesit që brohorisnin "refugjatët janë të mirëpritur këtu" përbënin pjesën më të madhe të turmave.
Policia ishte përgatitur për dhunë të mëtejshme, me mijëra oficerë të shpërndarë dhe më shumë se 100 ngjarje të parashikuara.
Trazirat u nxitën nga keqinformatat në internet se i dyshuari për sulmin vdekjeprurës me thikë ndaj tri vajzave të vogla në Southport më 29 korrik ishte një azilkërkues mysliman.
Xhamitë dhe hotelet ku strehoheshin azilkërkuesit ishin ndër vendet e vëna në shënjestër gjatë trazirave, me disa dyqane të djegura dhe të plaçkitura.
Të mërkurën, në rrugët kryesore në të gjithë Anglinë, pronarët e dyqaneve kishin mbyllur grilat dhe ishin mbyllur herët në pritje të dhunës së mëtejshme.
Avokatëve të imigracionit u ishte thënë nga policia të punonin nga shtëpia pasi listat e firmave të avokatëve dhe agjencive të këshillimit ishin shpërdarë në grupe bisedash si objektiva të mundshëm.
Por vetëm një pjesë e vogël e arrestimeve u raportuan gjatë mbrëmjes pasi demonstratat kaluan kryesisht në mënyrë paqësore nëpër pjesë të ndryshme të Anglisë./SyriNet
