Ministri i Punëve të Jashtme i Türkiyes, Hakan Fidan, gjatë vizitës zyrtare në Shkup, është takuar me kryetarin e Kuvendit, Afrim Gashi, si dhe me kryeministrin Hristijan Mickoski.

Siç njoftuan nga Kuvendi i Maqedonisë së Veriut, presidenti Gashi në takim theksoi se Maqedonia e Veriut dhe Türkiye ushqejnë një partneritet dhe miqësi të fortë tradicionale, duke shtuar se të dy vendet bashkëpunojnë mirë në kuadër të NATO-s. Nga atje po ashtu njoftuan se është nënshkruar një protokoll për bashkëpunim në fushën e integrimit evropian.

Gashi kujtoi edhe bashkëpunimin e shkëlqyer ekonomik, duke theksuar faktin që Türkiye është vazhdimisht ndër partnerët më të rëndësishëm tregtarë.

“Në këtë kontekst, presidenti theksoi se ne kemi konfirmuar interesimin tonë për nxitjen e bashkëpunimit ekonomik dhe inkurajimin e investimeve turke në vend, duke dërguar një promotor ekonomik në Türkiye, dhe në këtë drejtim angazhohet edhe Dhoma e Tregtisë e RSM-RT, MATTO”, thuhet në njoftim.

Bashkëbiseduesit u pajtuan se të dy vendet kanë lidhje historike dhe kulturore, ndërsa qytetarët nga komuniteti turk në vend dhe qytetarët që kanë emigruar dhe jetojnë në Republikën e Türkiyes janë urë për përmirësimin e marrëdhënieve.

Mickoski dhe Fidan theksuan rëndësinë e paqes dhe stabilitetit në rajon

Në njoftimin e dërguar nga Qeveria e Maqedonisë së Veriut thuhet se Mickoski dhe Fidan kanë biseduar për miqësinë shumëvjeçare mes dy vendeve, situatën aktuale politike dhe ekonomike, si dhe përparimin e Maqedonisë së Veriut drejt Bashkimit Evropian.

Kryeministri Mickoski theksoi se bashkëpunimi ekonomik dhe politik ndërmjet dy vendeve është i një rëndësie të madhe dhe se ekziston nevoja për thellimin e mëtejmë të tij. U bisedua edhe për mundësitë për rritjen e pjesëmarrjes së kompanive turke në ekonominë e Maqedonisë së Veriut dhe për investime të reja nga Türkiye.

“Si aleatë të NATO-s, Mickoski dhe Fidan theksuan rëndësinë e paqes dhe stabilitetit në rajon, duke theksuar se diplomacia mbetet kyçe për zgjidhjen e të gjitha konflikteve”, thuhet në deklaratë.

Mickoski theksoi se miqësia turke është e një rëndësie të madhe për Maqedoninë e Veriut, dhe komuniteti turk ka një kontribut të rëndësishëm në jetën shoqërore dhe ekonominë e vendit. Në të njëjtën kohë, u theksua se Türkiye është një mbështetëse dhe mike e dëshmuar e vendit dhe se ka hapësirë për thellimin e marrëdhënieve në disa fusha./aa