Patogjenët rezistentë ndaj ilaçeve mund të shkaktojnë më shumë se 39 milionë vdekje gjatë 25 viteve të ardhshme, sipas një parashikimi të publikuar në revistën “The Lancet”.

Studimi parashikon gjithashtu se 169 milionë vdekje do të shoqërohen me infeksione rezistente ndaj ilaçeve në atë kohë.

Studiuesit i bazojnë parashikimet e tyre në analizën e vdekjeve të fundit dhe ndikimin e masave për të frenuar vdekjet që lidhem me rezistencën mikrobike ndaj antibiotikëve (AMR). Ata zbuluan se më shumë se 1 milion njerëz vdisnin çdo vit si rezultat i infeksioneve rezistente ndaj ilaçeve midis 1990 dhe 2021.

Gjatë asaj kohe, vdekjet nga AMR tek fëmijët nën 5 vjeç ranë me 50 për qind, ndërsa ato te njerëzit e moshës 70 vjeç e lart u rritën me më shumë se 80 për qind.

Këto tendenca pritet të vazhdojnë, me vdekjet nga AMR tek fëmijët nën 5 vjeç që parashikohet të përgjysmohen deri në vitin 2050 dhe vdekjet tek njerëzit 70 vjeç e lart pritet të dyfishohen.

Studimi, i kryer nga Projekti i Kërkimit Global mbi Rezistencën Antimikrobiale (GRAM), parashikon se vdekjet nga AMR do të rriten në mënyrë të qëndrueshme në dekadat e ardhshme "nëse nuk merren masat e rehabilitimit".

Autorët vlerësojnë se 1.91 milion njerëz mund të vdesin si rezultat i drejtpërdrejtë i AMR në 2050 - një rritje prej pothuajse 70 për qind krahasuar me 1.14 milion vdekje në 2021. AMR gjithashtu parashikohet të kontribuojë në vdekjen e 8.22 milion në vit - një rritje prej gati 75 për qind nga 4.71 milionë vdekjet e lidhura në vitin 2021.

AMR ishte drejtpërdrejt përgjegjëse për 1.27 milion vdekje në 2019 dhe kontribuoi në 4.95 milion vdekje të tjera, sipas studimit GRAM 2022. Autorët vunë në dukje se rënia e vdekjeve të lidhura me AMR në 2021 - krahasuar me 2019 - ka të ngjarë për shkak të masave të vendosura gjatë pandemisë Covid-19, duke shtuar se ata besojnë se është e përkohshme.

“Këto gjetje theksojnë se AMR ka qenë një kërcënim i rëndësishëm për shëndetin global për dekada dhe se ky kërcënim është në rritje," tha autori i studimit Mohsen Naghavi, profesor në Universitetin e Uashingtonit.

Udhëheqësit globalë do të mblidhen në takimin e nivelit të lartë të Asamblesë së Përgjithshme të Kombeve të Bashkuara për të parashtruar planet globale për të trajtuar AMR./Tema