Me afrimin e dimrit, jeta po bëhet më sfiduese për palestinezët e zhvendosur që jetojnë në tenda të improvizuara në Khan Yunis, në jug të Rripit të Gazës.
Në zonën Al-Mawasi, në perëndim të Khan Yunisit, palestinezët që jetojnë në tenda po luftojnë me erërat e forta dhe shiun që kanë përfshirë zonën.
Al-Mawasi ka qenë ndër objektivat e bombardimeve izraelite që kanë vrarë shumë civilë deri më tani.
Një nga incidentet më shkatërruese ndodhi më 10 shtator, kur forcat izraelite bombarduan një kamp për personat e zhvendosur në zonën Al-Mawasi, duke vrarë 40 palestinezë dhe duke plagosur 60, sipas shërbimeve mjekësore zyrtare.
Pavarësisht një rezolute të Këshillit të Sigurimit të Kombeve të Bashkuara që bën thirrje për armëpushim të menjëhershëm, Izraeli ka vazhduar ofensivën e tij brutale me bombardime joselektive ndaj vendbanimeve civile, shkollave, objekteve fetare dhe spitaleve në Rripin e Gazës që nga tetori i kaluar.
Sipas autoriteteve lokale shëndetësore, gati 41.400 palestinezë, kryesisht gra dhe fëmijë, janë vrarë në sulmet izraelite që atëherë, dhe më shumë se 95.000 janë plagosur.
Izraeli përballet me akuza për gjenocid në Gjykatën Ndërkombëtare të Drejtësisë për veprimet e tij në Gaza./aa
