Sekretari i përgjithshëm i Kombeve të Bashkuara (OKB), Antonio Guterres, ka theksuar rrezikun e mundshëm që Libani të "kthehet në ferr", ku qindra njerëz humbën jetën brenda një dite si pasojë e sulmeve izraelite.
Në sesionin e Këshillit të Sigurimit të OKB-së të titulluar "Gjendja në Lindjen e Mesme", Guterres paralajmëroi se përleshjet midis Izraelit dhe Hezbollahut "mund ta shndërrojë Libanin në ferr".
"Po hapen dyert e ferrit në Liban. Ashtu siç i thamë dje Asamblesë së Përgjithshme, të gjithë duhet të shqetësohemi nga kjo. Libani është në skaj të humnerës", tha ai.
Duke iu referuar nevojës për të respektuar sovranitetin e Libanit, Guterres tha se ata mbështesin të gjitha përpjekjet për forcimin e Forcave të Armatosura të Libanit.
Shefi i OKB-së informoi se që nga tetori, rreth 200 mijë njerëz në Liban dhe më shumë se 60 mijë njerëz në veri të Izraelit është dashur të largohen nga shtëpitë e tyre për shkak të konflikteve midis Izraelit dhe Hezbollahut.
"Dita e hënë ishte më e përgjakshmja që ka ndodhur brenda një gjenerate në Liban", tha Guterres, duke shtuar informacionet e Ministrisë libaneze të Shëndetit Publik rreth numrit të viktimave.
Duke u bërë thirrje palëve që menjëherë t'i japin fund armiqësive, sekretari i përgjithshëm i OKB-së tha se "populli libanez, populli izraelit dhe populli i botës nuk mund të lejojnë që Libani të bëhet një Gazë tjetër"./aa
