Biblioteka Kombëtare e Kosovës (BKK) dhe Biblioteka Kombëtare e Türkiyes kanë nënshkruar memorandum bashkëpunimi.
Siç njofton Ministria e Kulturës, Rinisë dhe Sportit e Kosovës, memorandumi është nënshkruar nga drejtoresha e BKK-së, Blerina Rogova Gaxha, dhe Drejtori i Bibliotekës Kombëtare të Türkiyes, Taner Beyoğlu, gjatë Asamblesë së Përgjithshme të Drejtorëve të Bibliotekave Kombëtare të Evropës Juglindore, të mbajtur në Ankara.
“Kjo marrëveshje mbështet zhvillimin e aktiviteteve të përbashkëta kërkimore shkencore dhe promovuese në trashëgiminë kulturore të shkruar, bibliotekari dhe botim, konferenca profesionale, trajnime për stafin, vizita studimore, si dhe shkëmbimin e materialeve në fushën e shkencës, artit, historisë dhe letërsisë”, bëhet e ditur në njoftim.
Po ashtu, memorandumi përfshin edhe shkëmbimin e materialeve bibliografike në nivel ndërkombëtar, promovimin dhe zhvillimin e koleksioneve.
Tutje, palët janë zotuar se do të inkurajojnë bashkëpunimin dhe shkëmbimin e përvojave, njohurive në lidhje me teknologjinë e informacionit, shërbimet bibliotekare dhe praktikat digjitale, si dhe koleksionimin e botimeve elektronike./aa
