Instituti Ekonomik Gjerman (IW) ka bërë të ditur se nëse ish-presidenti i SHBA-së, Donald Trump, rizgjidhet në muajin nëntor atëherë mandati i tij 4-vjeçar mund t'i kushtojë Gjermanisë deri në 180 miliardë euro (afër 194.2 miliardë dollarë) në një "luftë tregtare".
Në një raport të publikuar së fundmi, IW-ja tha se premtimi i ish-presidentit Trump për rritjen e tarifave për të reduktuar deficitin tregtar të SHBA-së mund të shkaktojë ndërprerje të konsiderueshme në tregtinë globale.
Raporti i IW-së thotë se BE-ja ka hartuar kundër-strategji ndaj një kërcënimi të tillë, e cila thotë se nëse një administratë e mundshme e Trumpit rrit tarifat e importit në 10 për qind për BE-në dhe 60 për qind për Kinën, atëherë BE-ja do të vendosë rritje ekuivalente në hakmarrje.
Instituti IW kreu një simulim për të vlerësuar dëmin e mundshëm për ekonominë gjermane nëse do të ndodhte një gjë e tillë dhe zbuloi se prodhimi bruto i brendshëm i vendit do të humbiste më shumë se 137.1 miliardë dollarë gjatë katër viteve të ardhshme.
Ndërkohë, një tjetër simulim zbuloi se nëse një administratë e mundshme e Trumpit dhe BE-ja do të rrisnin tarifat e tyre të importit në 20 për qind secila, prodhimi bruto i brendshëm gjerman do të shënonte rënie me 1.5 për qind, me humbje totale prej 194.2 miliardë dollarësh brenda katër viteve.
Raporti i IW-së thotë se ekonomia amerikane do të pësojë gjithashtu humbje prej rreth 1.3 për qind deri në 1.5 për qind të prodhimit bruto të brendshëm në vitin 2025, me efektet negative që do të ndjehen më së shumti në dy vitet e para dhe do të zvogëlohen në dy vitet në vijim.
IW-ja theksoi se Kina, sjellja e së cilës në tregtinë e lirë globale përshkruhet në raport si një sfidë, ka nevojë për masa hakmarrëse në formën e tarifave shtesë nga BE-ja dhe Gjermania gjatë një periudhe të tensionuar gjeopolitikisht./aa
