Sipas burimeve lokale, disa dronë luftarakë të panjohur kanë shënjestruar dy baza ushtarake amerikane në Siri.
Baza ushtarake amerikane në fushën e naftës Al-Omar në provincën Deir ez-Zor, në Sirinë lindore, u sulmua të dielën në mbrëmje nga dronët e shumtë kamikazë, thanë burimet lokale për Anadolu.
Sirenat u dëgjuan në zonën e bazës ushtarake, ndërsa avionë ushtarakë amerikanë fluturonin mbi zonë, shtuan burimet.
Më vonë, trupat amerikane të dislokuara në bazë shënjestruan me predha artilerie fshatrat Khusham, Al-Jafra, Al-Huwaijah dhe Al-Mari'iyah, të vendosura në perëndim të lumit Eufrat, ku besohet se janë të vendosura grupet e mbështetura nga Irani.
Deir ez-Zor është nën okupimin e organizatës terroriste PKK/YPG të mbështetur nga SHBA, ndërsa qendra e qytetit dhe zonat e tjera rurale janë nën kontrollin e regjimit të Bashar al-Asad dhe grupeve të mbështetura nga Irani.
Ndërkohë, me dronë u sulmua edhe baza ushtarake amerikane Al-Tanf pranë kufirit Jordan-Siri, në Sirinë juglindore.
Korrespondenti i Anadolut tha se mbrojtja ajrore amerikane në bazë rrëzoi disa nga dronët, ndërsa të tjerët goditën bazën.
SHBA nuk kanë lëshuar një deklaratë deri më tani për sulmet në dy bazat, ndërsa nuk raportohet për viktima,
Muajt e fundit, sulme me dronë dhe raketa janë kryer kundër bazave të SHBA-së në Siri nga grupe të armatosura të panjohura, të cilat mund të jenë të mbështetura nga Irani./aa
