Inteligjenca artificiale (AI) konsumon aq shumë energji sa që pritet që qendrat e të dhënave për zhvillimin e kësaj teknologjie në Evropë të kenë nevojë për gati tre herë më shumë energji deri në vitin 2030, sipas studimit të fundit.
Studimi, i publikuar nga firma konsulente McKinsey, tregoi se kërkesa për energji elektrike parashikohet të kalojë 150 teravat-orë (TWh) deri në vitin 2030 nga 62 TWh sot.
Kjo do të thotë se rreth pesë për qind e konsumit total të energjisë në Evropë do të shkojë për inteligjencën artificiale, ndërsa aktualisht konsumon rreth dy për qind, thuhet në studim.
Sipas një studimi, nevoja në rritje e inteligjencës artificiale për energji elektrike mund të përshpejtojë ndryshimet klimatike nëse nuk mundësohet nga burime të rinovueshme të energjisë.
Rritja e kërkesës për energji të gjelbër
Aktualisht, pjesa më e madhe e energjisë elektrike për qendrat e të dhënave ende vjen nga lëndët djegëse fosile.
Kërkesa në rritje për energji elektrike të pastër sjell sfida të rëndësishme, tha për dpa partneri i McKinsey, Diego Hernandez Diaz.
Burimet e besueshme të energjisë janë të disponueshme vetëm në një masë të kufizuar, vëren ai.
Përveç kësaj, ka pengesa në disponueshmërinë e punëtorëve të kualifikuar.
Studimi tregon gjithashtu se kërkesa shtesë për energji elektrike të gjelbër kërkon investime të mëdha në burimet e rinovueshme të energjisë. /tesheshi.com/
