Agjencia më e lartë e Rusisë kundër terrorizmit tha të hënën se sulmi me bombë që vrau një bloger të njohur ushtarak rus ishte organizuar nga agjencitë ukrainase të sigurisë.
Zyrtarët rusë thanë se Vladlen Tatarsky, 40 vjeç, u vra të dielën nga shpërthimi i një bombe teksa po mbante një diskutim në një kafene në brigjet e lumit Neva në zemrën historike të Shën Petersburgut. Mbi 30 persona u plagosën nga shpërthimi ndërsa 10 prej tyre mbeten në gjendje të rëndë, sipas autoriteteve.
Komiteti Kombëtar Anti-Terrorist, një strukturë shtetërore që koordinon kundërterrorizmin, tha se sulmi ndaj Tatarsky ishte “planifikuar nga shërbimet speciale ukrainase” me përfshirjen e njerëzve që kanë bashkëpunuar me një fondacion anti-korrupsion të krijuar nga lideri i opozitës rus i burgosur Alexei Navalny. Po ashtu Rusia vuri në dukje se e dyshuara e arrestuar ishte një “mbështetëse aktive” e grupit të Navalny-t.
Policia ruse arrestoi të hënën një grua të dyshuar për dorëzimin e një bombe që vrau një bloger të njohur ushtarak, i cili mbështeti me zjarr luftën e Moskës në Ukrainë.
Hetuesit besojnë se bomba ishte fshehur në një bust që e dyshuara ia kishte dhënë blogerit si dhuratë pak para shpërthimit.
Komiteti Hetues i Rusisë, agjencia më e lartë shtetërore e hetimit penal, tha se Darya Tryopova u arrestua me dyshimin për përfshirje në vrasjen e Tatarsky.
26-vjeçarja, banore në Shën Petersburg, ishte arrestuar më parë për pjesëmarrje në protestat kundër luftës.
