Rama në Verona, takim me ministrin e Zhvillimit Ekonomik Adolfo Urso

 Kryeministri Edi Rama zhvilloi sot një takim në Verona me ministrin e Zhvillimit Ekonomik të Italisë, Adolfo Urso.

Në këtë takim, kryeministri Rama shoqërohej nga ministrja e Bujqësisë dhe Zhvillimit Rural, Frida Krifca dhe zv/ministri për Europën dhe Punët e Jashtme, Besart Kadia.

Kryeministri Rama mori pjesë dje në panairin më të madh të verës në Europë “VinItaly”, ku prodhuesit shqiptarë të verës prezantuan produktet e tyre për herë të parë në stendën e “Open Balkan”, së bashku me prodhues nga Serbia dhe Maqedonia e Veriut.

Shqipëria u prezantua në këtë panair nga 20 prodhuesit më të mirë të verës, të cilët ekspozuan verërat  “Made in Albania”, tashmë marka të njohura në tregun ndërkombëtar ku eksportojnë prej vitesh.

Në kuadër të këtij panairi, kryeministri Rama, Presidenti i Serbisë, Aleksandar Vuçiç dhe Kryeministri i Republikës të Maqedonisë së Veriut, Dimitar Kovaçevski zhvilluan një takim mes tyre, në përfundim të të cilit dhanë një konferencë të përbashkët për shtyp, ku konfirmuan se vëllimi tregtar i vitit 2022 midis vendeve të “Ballkanit të Hapur” është rritur me 24.8%.