Tetë prej 10 fëmijëve në shkollat e Afrikës së Jugut, kanë probleme me leximin deri në moshën 10-vjeçare, ka gjetur një studim ndërkombëtar. Afrika e Jugut është renditur e fundit, në mesin e 57 shteteve që janë vlerësuar në hulumtimin rreth përparimit në lexim. Në këtë studim kanë marrë pjesë 400.000 nxënës nga e gjithë bota.
Hulumtimi është realizuar më 2021. Shkalla e analfabetizmit në mesin e fëmijëve të Afrikës së Jugut, është rritur nga 78 për qind, më 2016, në 81 për qind. Autoritetet kanë thënë se pandemia e koronavirusit e ka nxitur këtë rezultat. Ministrja e Arsimit në këtë vend, Angie Motshekga, ka thënë se përveç pandemisë, Afrika e Jugut po përballet me sfida të shumta, përfshirë varfërinë dhe pabarazinë.
Edukimi është një prej shpenzimeve më të mëdha buxhetore për qeverinë në Afrikën e Jugut. Mungesa e materialeve të nevojshme për lexim dhe infrastruktura joadekuate në shkolla – përfshirë këtu edhe tualetet – i kanë kontribuuar krizës. Në anën tjetër, Singapori është renditur në vendin e parë. Studimi, po ashtu, ka treguar se, në përgjithësi, vajzat janë më përpara se djemtë në mësime, në pothuajse të gjitha vendet.
