Turqia është e përkushtuar për garantimin e pavarësisë, sovranitetit dhe integritetit territorial të Ukrainës, duke përfshirë Krimenë, tha sot ministri i Jashtëm i vendit, Hakan Fidan, raporton Anadolu.
“Ne do të mbështesim Ukrainën në përballimin e pasojave shkatërruese ekonomike të luftës. Do të mbështesim Ukrainën në trajtimin e krizës humanitare që ka lindur nga lufta”, tha Fidan në Konferencën e Rimëkëmbjes së Ukrainës në Londër.
Duke përsëritur qëndrimin e Ankarasë ndaj pavarësisë, sovranitetit dhe integritetit territorial të Ukrainës, duke përfshirë Krimenë, ai tha: “Qëndrimi ynë mbetet parimor dhe i vendosur si gjithmonë”.
Duke folur për marrëveshjen e drithit të Detit të Zi dhe marrëveshjen për shkëmbimin e të burgosurve të luftës, Fidan tha se presidenti turk Recep Tayyip ErdoÄŸan ka punuar pa pushim për të lehtësuar vuajtjet e shkaktuara nga lufta në Ukrainë.
“Tani duhet të punojmë në hartimin e një kuadri financiar që do të kontribuojë në rindërtimin dhe rimëkëmbjen e Ukrainës në mënyrë të qëndrueshme”, nënvizoi Fidan, duke kujtuar se kontraktorët turq ishin të angazhuar tashmë në 50 projekte në Ukrainë kur filloi lufta.
Ai vuri në dukje se kontraktorët turq vazhdojnë të zbatojnë 29 projekte në vendin e goditur nga lufta pavarësisht konfliktit.
“Ne do të vazhdojmë të inkurajojmë njerëzit tanë të biznesit dhe kontraktorët që t’i përmbushin detyrimet ndaj popullit të Ukrainës, pavarësisht se sa të vështira janë kushtet”, shtoi Fidan.
Duke iu referuar memorandumit të mirëkuptimit për rindërtim të nënshkruar nga ErdoÄŸan dhe presidenti ukrainas Volodymyr Zelenskyy në Lviv vitin e kaluar, ministri i Jashtëm turk deklaroi se Ankaraja është e përkushtuar të sjellë në tryezë përvojën dhe aftësitë e saj të plota.
“Ne do ta vazhdojmë progresin e deritanishëm për të mbështetur përpjekjet e rindërtimit dhe rimëkëmbjes së Ukrainës”, shtoi Fidan.
