Të rinjve në Kinë i është bërë një ofertë e pazakontë.
Për shkak të mungesës së vendeve të punës, ata paguhen nga prindërit e tyre për të qëndruar në shtëpi.
E rraskapitur nga presioni për të pasur sukses si fotografe, Litsky Li pranoi ofertë e mirë.
Li, 21 vjeç, tani i kalon ditët e saj duke blerë ushqime për familjen e saj në qytetin qendror të Luoyang dhe duke u kujdesur për gjyshen e saj, e sëmurë. Prindërit e saj i paguajnë asaj një pagë prej 835 dollarë në muaj, e cila konsiderohet një pagë solide e klasës së mesme në zonën e saj.
“Arsyeja pse jam në shtëpi është sepse nuk mund ta duroj presionin e të shkuarit në shkollë apo në punë,” tha Li, një e diplomuar në shkollë të mesme. “Nuk dua të konkurroj intensivisht me moshatarët e mi. Kështu që unë zgjedh të ‘pushoj plotësisht’”, tha ajo, duke përdorur një frazë popullore që i referohet shmangies së orëve rraskapitëse dhe vlerave tradicionale familjare në favor të ndjekjes së një jete më të thjeshtë.
“Nuk kam nevojë domosdoshmërisht për një punë më të paguar apo një jetë më të mirë,” shtoi ajo.
Li nuk është vetëm. Dhe nuk është vetëm pakënaqësia që nxit fenomenin e “djemve dhe vajzave me kohë të plotë”, një shprehje që u shfaq për herë të parë në faqen e njohur të mediave sociale kineze Douban në fund të vitit të kaluar.
Shumica e dhjetëra mijëra të rinjve që identifikohen si të tillë në mediat sociale thonë se po qëndrojnë në shtëpi sepse thjesht nuk mund të gjejnë punë.
Shkalla e papunësisë për 16 deri në 24 vjeç në zonat urbane arriti në 21.3% muajin e kaluar, një rekord i lartë.
