Policia franceze ndaloi dy pasagjerë në një aeroplan që transportonte rreth 300 qytetarë indianë, përfshirë të mitur të pashoqëruar, me dyshimin për trafikim njerëzor pas një informacioni anonim.
Avioni Airbus A340 që fluturonte nga Emiratet e Bashkuara Arabe, i nisur për në Amerikën e Jugut, u ul të enjten në aeroportin Vatry në Francën lindore për një ndalesë teknike.
Ai u mbajt nga autoritetet franceze pas një njoftimi anonim se po transportonte pasagjerë “me gjasa që ishin viktima të trafikimit të qenieve njerëzore”, tha zyra e prokurorit të Parisit për AFP.
Dy personat e arrestuar ishin mes pasagjerëve.
15 anëtarët e ekuipazhit të fluturimit të Legend Airlines – rrugës nga aeroporti Fujairah për në kryeqytetin e Nikaraguas, Managua – u morën në pyetje dhe u liruan, sipas një avokati të linjës ajrore me bazë në Rumani.
Ajo tha se janë thellësisht të tronditur nga ajo që ka ndodhur.
Zyra e prokurorit tha se kontrollet e identitetit po kryheshin për të gjithë 303 pasagjerët.
Ata po kontrollonin gjithashtu kushtet në të cilat po transportoheshin pasagjerët dhe qëllimin e udhëtimit të tyre.
Njësia kombëtare kundër krimit të organizuar JUNALCO po udhëheq hetimin, thanë prokurorët.
Sipas një burimi të njohur me rastin, pasagjerët mund të kishin planifikuar të udhëtonin në Amerikën Qendrore për të tentuar hyrjen e paligjshme në SHBA ose Kanada.
Pas uljes në Francë, ata fillimisht u mbajtën në avion, por më pas u lejuan të largoheshin nga avioni.
Ata qëndruan në aeroport gjatë natës të premten, thanë autoritetet lokale.
Ambasada indiane në Francë tha në një deklaratë në X, dikur Twitter, se autoritetet në Paris i kishin informuar ata për situatën.
Liliana Bakayoko, e cila tha se ishte një avokate e linjës ajrore, i tha “AFP” se kompania besonte se nuk kishte bërë asgjë të keqe, nuk kishte kryer asnjë shkelje “dhe është në dispozicion të autoriteteve franceze”.
Trafikimi i qenieve njerëzore mbart një dënim të mundshëm deri në 20 vjet në Francë./dita
