Ministri për Evropën dhe Punët e Jashtme, Igli Hasani deklaroi sot se, Shqipëria është sot gati për Konferencën e Dytë Ndërqeveritare me BE.

Në një konferencë për shtyp në ambientet e Ministrisë për Evropën dhe Punët e Jashtme, mbi bilancin e punës së diplomacisë për vitin 2023 dhe pritshmërinë e vitit të ardhshëm, Hasani u shpreh se, diplomacia shqiptare në 2023 ka qenë periudhë e paprecedentë arritjesh dhe suksesesh.

“Në tre vitet e fundit, Shqipëria ka luajtur një  rol të dorës së parë në forumet më të larta të politikës ndërkombëtare”, tha Hasani

Ministri u shpreh se, “mandati në Këshllin e Sigurimit, na u dha në një kohë jo të lehtë për politikën ndërkombëtare. Megjithatë ia dolëm të kemi një performancë dinjitoze e të respektuar. Falë kësaj performance, ne gëzojmë sot respektin dhe admirimin e partnerëve”.

Hasani theksoi se, “kandidaturat e Shqipërisë për KDNJ dhe UNESCO u mbështetën masivisht”, teksa shtoi ai, “rival kishim Rusinë”.

“Në 2023 kishim një progres të ndjeshëm në procesin e integrimit europian. Puna e Shqipërisë në këtë drejtim është vlerësuar si një model suksesi për gjithë rajonin”, tha Hasani.

Ministri nënvizoi se, “Shqipëria është sot gati për Konferencën e Dytë Ndërqeveritare”, teksa shtoi se, “presim lajme të mira në fillim të vitit 2024 sa i përket negociatave me BE”.

Gjithashtu, Hasani theksoi se, bashkëpunimi me faktorin shqiptar në rajon është një tjetër arritje për vitin që po lëmë pas.

“Konsolidimi i mëtejshëm i bashkëpunimit me diasporën, prioritet kyç për 2024”, u shpreh ai.

Hasani shtoi se, “Shqipëria krenohet me rritjen kontributit të saj në proceset rajonale”.

“Presidencat e nismave që marrim në 2024, do të ndihmojnë në thellimin e bashkëpunimit dhe integrimin rajonal”, tha ministria, teksa shtoi se, diplomacia ekonomike është në fokus të prioriteteve të MEPJ për 2024.

Hasani nënvizoi se, “Shërbimi i Jashtëm do të punojë për të tërhequr sa më shumë projekte e investime”.

“Do të punojmë për të promovuar sa më mirë mundësitë që ofron Shqipëria. Po punojmë për projektimin e rrjetit të atasheve tregtarë dhe themelimin e Këshillit të Eksporteve “, tha ai.

Hasani u shpreh se, “ristrukturimi i Shërbimit të Jashtëm është po ashtu një nga prioritetet tona për 2024”./ata