Dhjetëra mijëra njerëz përmbytën rrugët e Stambollit në ditën e Vitit të Ri për të demonstruar kundër “PKK-së dhe terrorizmit izraelit” dhe në mbështetje të palestinezëve në Rripin e Gazës, me marshimin që arrinte mbi dhe rreth urës së Gallatës.
Mes protestuesve ishte edhe një nga djemtë e presidentit turk Rexhep Tajip Erdogan.
Sipas agjencisë turke të lajmeve Anadolu, “qindra mijëra” protestues iu përgjigjën thirrjes së një platforme të më shumë se 300 organizatave dhe shoqatave për t’u mbledhur në mbështetje për Palestinën e jo vetëm.
Dymbëdhjetë ushtarë turq u vranë në Irakun verior në fund të dhjetorit në dy sulme që i atribuohen Partisë së Punëtorëve të Kurdistanit (PKK).
Që nga fillimi i luftës midis Izraelit dhe Hamasit, presidenti Erdogan, një mbështetës stoik i çështjes palestineze, ka përçuar gjuhë të ashpër kundër Izraelit, duke denoncuar gjithashtu mbështetjen e SHBA për qeverinë izraelite.
Një pankartë e madhe me ngjyrat e flamurit palestinez ishte varur në mes të urës.
Kujtojmë se javën e kaluar, Erdogan e krahasoi Netanyahun me Hitlerin duke thënë: “…A është ajo që po bën Netanyahu më pak se ajo që bëri Hitleri?”.
Bilal Erdogan, djali i dytë i liderit turk, gjithashtu iu drejtua protestuesve duke përshëndetur “dëshmorët” e ushtrisë të vrarë në Irak: “Lutjet tona janë armët tona më të mira për të dalë nga errësira…”.
“Unë kam qenë në Bregun Perëndimor, në Jerusalem, në Gaza: njerëzit atje i kanë vendosur shpresat e tyre në Turqi dhe te Rexhep Tajip Erdogan,” i tha ai turmës së mbledhur.
Bilal Erdogan, 42 vjeç, kryetar i “Fondacionit Rinia dhe Edukimi” që bashkëorganizoi demonstratën, po përmendet si një pasardhës i mundshëm i babait të tij në udhëheqjen e vendit. /tesheshi.com/
