Ministri për Evropën dhe Punët e Jashtme, Igli Hasani u shpreh gjatë konferencës së përbashkët për shtyp në Prishtinë me homologen Gërvalla se së bashku kanë rënë dakord për zbatimin e detyrimeve që lindin nga marrëveshjet e nënshkruara në kuadër të mbledhjeve të përbashkëta të dy qeverive, por edhe për bashkëpunimin e mëtejshëm për lehtësimin e lëvizjes së qytetarëve dhe mallrave.
“U dakordësuam për rëndësinë e shtimit të përfaqësimit të përbashkët diplomatik, por edhe për koordinimin në kuadër të diplomacisë ekonomike që mbetet një nevojë parësore për të dyja vendet tona. Ramë dakord po ashtu të nxisim dhe intensifikojmë më tej punën për mërgatën shqiptare kudo në botë”, theksoi ai.
Lidhur me çështjet ekonomike, Hasani vlerësoi hapat e ndërmarra në lehtësimin e qarkullimit ndërkufitar në funksion të nxitjes së shkëmbimeve tregtare, por edhe heqjen e kontrolleve kufitare gjatë fundjavave në kufirin Shqipëri-Kosovë, çka ka sjellë një rritje të qarkullimit të mjeteve dhe udhëtarëve.
“Studimi i fizibilitetetit të ndërtimit të hekurudhës Durrës-Prishtinë, i hap rrugën edhe projektit tjetër, atij terminalit hekurudhor të mallrave në Prishtinë, të quajtur Porti i Thatë i cili do ta shndërrojë kryeqytetin e Kosovës në një hap për transportin e mallrave ne rajon” vijoi Hasani.
“Në funksion të këtyre ideve dhe në funksion të mbarëvajtjes së punës, si pjesë e ristrukturimit të Ministrisë për Europën dhe Punët e Jashtme të Republikës së Shqipërisë, ne, do të kemi së shpejti një drejtori të posaçme dedikuar koordinimit të punës me faktorin shqiptar në rajon”, theksoi Hasani./ata
